Densaýlyq saqtaý ministriniń birinshi orynbasary Marat Shoranov revaktsinatsiia týraly pikir bildirdi, dep habarlaidy "Ult aqparat".
Marat Shoranovtyń aitýynsha, vaktsina alyp qoiǵan adamdardyń alty aidan keiin qaita ekpe alýy qanshalyqty mindetti ekeni týraly naqty málimet ázirge joq.
«Densaýlyq saqtaý ministrligine alty aidan keiin revaktsinatsiia júrgizý qajettigi týraly resmi aqparat túsken joq. Biz turaqty jumys júrgizip otyrmyz. Barlyq ázirleýshilerimizben bailanystamyz, revaktsinatsiia týraly dáleldi, negizdi túsinik úshin álemdik tájiribeni zerdelep jatyrmyz» - dedi vitse-ministr.
Vedomstvo ókili naqty aqparat paida bolǵan jaǵdaida ministrlik qajetti sharalar qabyldap, nusqaýlyqtarǵa túzetý engizetin bolady.
«Bul, árine, vaktsinalar kólemin josparlaýǵa áser etedi. Biz bul máseleniń mańyzdylyǵyn túsinip otyrmyz», - dedi Marat Shoranov ortalyq kommýnikatsiialar qyzmetinde.
Brifing barysynda Marat Shoranov vaktsina alǵan adamdardyń eki apta ótken donor bola alatynyn aitty.
«Jalpy vaktsina alǵan adamnyń donor bolýyna eshqandai shekteý joq. Tek bir ǵana shekteý bar. Ekpe alǵanan keiin eki aptanyń ishinde donor bolýǵa bolmaidy. Al jalpy ǵalymdardyń málimeti boiynsha ondai shekteýler joq», - dedi vitse ministr.
