QR DSM Qoǵamdyq densaýlyq saqtaý ulttyq ortalyǵy direktory Damir Kóbjasarov vaktsina alar aldyndaǵy rásimderdi túsindirdi, dep habarlaidy QazAqparat.
«Vaktsinalaý kezinde ekpege kelisetini nemese bas tartatyny týraly qolhat alynady. Ekpe qoiar aldynda dáriger balanyń ata-anasyna tiisti málimetterdi berýi kerek. Iaǵni vaktsinanyń sipaty, qandai infektsiiaǵa qarsy qoiylyp jatqany jaiynda, odan qandai reaktsiia bolatyndyǵy týraly, sondai-aq vaktsinanyń quramy jaiynda túsinik beredi», - dedi ol onlain brifingte.
Onyń sózine qaraǵanda, bul sharalar balanyń ata-anasy vaktsina týraly habardar bolýy úshin jasalady.
«Osydan keiin balanyń ata-anasy ekpege kelisetini nemese odan bas tartatyny týraly sheshim qabyldaidy», - dedi spiker.
Sonymen qatar ol ekpeden bas tartý keiinnen qandai saldarǵa alyp kelýi múmkin ekenin aitty.
«Vaktsinadan bas tarta otyryp, ata-ana ózine tiisti jaýapkershilikti alady, iaǵni bul jaǵdai qandai da bir maǵynada balanyń bolashaǵyna áser etýi múmkin. Sebebi ózge elderde stýdentti oqýǵa qabyldaý kezinde naqty vaktsinalarǵa tiisti sertifikattyń bolýyn suraidy. Sonymen birge, ata-ana balanyń densaýlyǵy úshin ózine jaýapkershilik alady», - dedi D. Kóbjasarov.
