QR Eńbek jáne halyqty áleýmettik qorǵaý ministrliginiń jelisi boiynsha memlekettik qyzmetter Smart Astana mobildik qosymshasyn paidalanýshylarǵa qoljetimdi, dep habarlaidy "Ult aqparat".
Atalǵan vedomstvonyń Facebook-tegi paraqshasynda jariia etilgen aqparatqa sáikes, onda azamattyń áleýmettik mártebesin tekserýge, shegerimder týraly, onyń ishinde jumysynan airylý jaǵdaiyndaǵy tólemder týraly aqparatty alý múmkindigi bar. Platformada qaladaǵy ózekti, bos jumys oryndarynyń tizimi qoljetimdi, sondai-aq túiindemeni jiberýge bolady.
«Eńbek ministrligi, qala ákimdigi jáneAstana Innovations birlesken jumysynyń nátijesinde Smart Astana mobildik qosymshasy enbek.kz portalymen sinhrondaldy. Sondyqtan elordalyq jumys berýshilerdiń bos jumys oryndarynyń tizimi kún saiyn jańartylyp otyrady. Jumysty naqty laýazymdy nemese kompaniia ataýyn kórsete otyryp izdeýge, sonymen qatar usynystar tizimin qarap shyǵýǵa múmkindik bar. Suranysqa ie bos jumys oryndarynyń arasynda orta mektep muǵalimderi, ádiskerler, kolledj muǵalimderi, tárbieshiler, dárigerler, meiirgerler, hatshylar, elektrikter men avtoslesarlar, kúzetshiler, bólme tazalaýshylar kiredi. Negizinen qyzmetkerlerdi tolyq jumys kúnine izdeidi, ortasha eńbek ótili – 2-3 jyl. «Túiinde» qosymsha paraǵynda talapkerler ózderi týraly barlyq derekterdi toltyryp, ornalastyra alady. Jumys berýshi ózine laiyqty qyzmetkerdi izdeý úshin qosymshany paidalana alady», - delingen ministrlik habarlamasynda.
Áleýmettik tólemderdiń mártebesin tekserý atalmysh qosymsha men Memlekettik áleýmettik saqtandyrý qorynyń birlesken qyzmeti nátijesinde múmkin bolyp otyr. Ol úshin «Qalalyq qyzmetter» bólimine ótip, «Áleýmettik tólemder mártebesi» belgishesin basqan soń JSN engizip, aýdarymdar túrin tańdaý qajet. Mysaly, eger adam jaldamaly jumysker bolsa, onda ai saiynǵy jarnalar men áleýmettik meditsinalyq saqtandyrý jelisi boiynsha aýdarymdardy jumys berýshi tóleitin bolady. Júie bul týraly paidalanýshyǵa dereý habarlaidy. Eger platformada adamnyń áleýmettik mártebesi týraly eshqandai aqparat kórsetilmese, ol mundaǵy jaǵdaidy saýalnamany toltyrý arqyly túzete alady.
