Meksikalyq boksshy Saýl Alvares Gennadii Golovkinmen ótetin jekpe-jekke daiyndyq barysynda oǵan Dúnijúzilik antidopingtik agenttik ókilderiniń qansha márte kelgeni týraly aitty, dep habarlaidy Sports.kz.
«Alvarestiń baǵamdaýynsha, VADA sońǵy ai ishinde boksshyny shamamen 15-20 ret tekseristen ótkizgen», - dep jazady Los Angeles Times gazetiniń jýrnalisi Dilan Ernandes.
Eske salaiyq, aqpan aiynda «Kanelo» klenbýterolǵa jasalǵan doping-synamadan eki ret ótpei qalyp, jarty jylǵa bokstan shettetilgen edi. Saldarynan boksshynyń 5 mamyrǵa Golovkinmen josparlanǵan qarymta kezdesýi bolmai qaldy.
Degenmen, boksshylar 15 qyrkúiekte qaita kezdesetin boldy. Ol ýaqytqa deiin meksikalyq sportshynyń jarysqa qatysý quqyǵy qaitarylatyn bolady. Diskvalifikatsiialaý merzimi 17 tamyzda aiaqtalady.
