Qazir máiithanadamyz, baýyrlarymyzdyń múrdesin búgin tústen keiin bizge beredi, deidi Almaty oblysy Uzynaǵash aýylynda mal satyp, keiin iz-túzsiz joǵalyp ketken jigitterdiń týysqany Tursyn Álimhan «QazAqparat» tilshisine.
«Máiitterdi áli bizge bergen joq. Tústen keiin beredi dep otyr. Qazir máiithanadamyz», - dedi Zarlyhanuly Muqiiat pen Álimhan Qadylbektiń aǵaiyny Tursyn Álimhan.
Sonymen qatar, Tursyn Álimhanuly kúdiktilerdiń marqumdardy burynnan tanýy múmkin degen aqparatty joq shyǵardy.
«Saýdany marqumdar eshkimmen birigip jasaǵan joq. Ózderiniń mańdai teri, adal eńbegi edi. Úsheýiniń artynda 9 bala jetim qaldy», - dedi Tursyn Álimhan.
Aita keteiik, áleýmettik jelilerde kúdiktilerdiń olardy tanýy múmkin degen aqparat taraǵan edi.
Eske sala keteiik, ótken jeksenbide BAQ-ta Almaty oblysy Jambyl aýdanynda mal saýdasymen ainalysyp júrgen úsh jigittiń joǵalyp ketkeni týraly habarlanǵan bolatyn.
Marqumdardyń týysqandarynyń aitýynsha, Doldanuly Jarqynbek (1979 jyly týǵan), Zarlyhanuly Muqiiat (1973 jyly týǵan), Álimhan Qadylbek Shyǵys Qazaqstan oblysynyń Tarbaǵatai aýdanynan satyp alǵan 40 bas maldy eki júk kóligimen 17 qyrkúiek kúni Uzynaǵash bazaryna shyǵarǵan. 19 qyrkúiekte sońǵy ret bailanysqa shyqqan. Birneshe kúnnen keiin olardyń denesi tabyldy.
24 qyrkúiekte Almaty oblystyq Ishki ister departamentiniń baspasóz qyzmeti iz-túzsiz joǵalǵan úsh aǵaiyndynyń ólimine qatysty kúdiktiler ustalǵanyn habarlady.
«Oblystyq IID basshysynyń birinshi orynbasary podpolkovnik Nurlan Másimov basshylyq etken izdeý sharalaryna aýdandyq jáne aimaqtyq politseiler de jumyldyryldy. Joǵalǵandardy óltirdi degen kúdikpen Jambyl aýdanynyń eki azamaty ustaldy. Jábirlenýshilerdiń deneleri tabyldy. QR QK 99-baby, 2-bólimi boiynsha (Kisi óltirý) qylmystyq is qozǵaldy», - delingen baspasóz qyzmetiniń habarynda.
Kisi óltirý faktisi boiynsha tergeý jumystary Almaty oblystyq Ishki ister departamenti basshylyǵynyń qatań baqylaýyna alynǵan.
