Almatyda Ujymdyq bitimgershilik kúshteriniń áskeri qyzmetshilerin shyǵaryp salý rásiminde qala ákimi Baqytjan Saǵyntaev sóz sóiledi. Onda ol UQShU-ǵa qatysýshy barlyq memleketter QR Prezidenti Qasym-Jomart Toqaevtyń konstitýtsiialyq tártipti ornatýǵa jáne terroristik qaýip-qaterdi jeńýge járdemdesý úshin bitimgershilik kontingentin tartý týraly úndeýin biraýyzdan qoldaǵanyn eske saldy, dep habarlaidy QazAqparat.
Qala ákiminiń aitýynsha, bul kúnderi bitimgerler aýqymdy jumys atqardy.
«Birinshi kezekte mańyzdy memlekettik jáne strategiialyq obektilerdiń kúzeti men qorǵanysyn kúsheitý boiynsha bekitilgen ýchaskelerde quqyqtyq tártipti saqtaýǵa kómek kórsetildi. Munyń bári Almatydaǵy jaǵdaidy turaqtandyrýda úlken ról atqardy», – dep atap ótti ol.
Sondai-aq, Baqytjan Saǵyntaev qalanyń tynys-tirshiliginiń barlyq salalaryn qalpyna keltirý jumystary qarqyndy júrip jatqanyn aitty.
Eske salsaq, búgin Almatyda Ujymdyq bitimgershilik kúshteriniń áskeri qyzmetshilerin shyǵaryp salý rásimi ótti. Oǵan UQShU-nyń Bas hatshysy Stanislav Zas, Qazaqstan Respýblikasy Qorǵanys ministriniń orynbasary general-maior Muhamedjan Talasov, Almaty qalasynyń ákimi Baqytjan Saǵyntaev qatysty.
