Búgin Astanada Qazaqstan Respýblikasy Tuńǵysh Prezidenti – Elbasy Qory Qazaqstan halyqtarynyń tilderi kúnine orai úzdik qazaqtildi internet-sait baiqaýyna ótinimder qabyldaý bastalǵanyn jariialady. Baiqaý ótkizýdegi seriktes – Memlekettik tildi damytý qory.
Baiqaý maqsaty – internet júiesindegi úzdik qazaqtildi resýrstardy anyqtaý men nasihattaýǵa, aqparattyq resýrstar men servisterdiń sany men sapasyn arttyrýǵa, jeli qoldanýshylarynyń qyzyǵýshylyǵyn ulǵaitýǵa, aqparat keńistiginde qazaq tiliniń qoldanys aiasyn keńeitýge jáne úzdikterdiń tanymaldylyǵyn kóterýge yqpal etý.
Baiqaýǵa úkimettik emes, táýelsiz qoǵamdyq saittar, ǵalamtor keńistigindegi tájiribesi keminde bir jyldy quraityn, qazaq tilinde aqparat taratatyn jáne qyzmet túri Qazaqstan Respýblikasynyń qoldanystaǵy zańnamasyna qaishy kelmeitin kez kelgen sait qatysa alady. Baiqaýǵa memlekettik organdardyń, sheteldik uiymdardyń, buqaralyq aqparat quraldarynyń elektrondy nusqalary (gazet, tv, radio) qatysa almaidy.
Syilyq mynadai nominatsiialar boiynsha taǵaiyndalady: «Ótkir til» — qazaq tilin jáne ulttyq qundylyqtardy nasihattaýshy úzdik sait, «Rýhani azyq» – qazaq ádebieti men mádenietin nasihattaýshy úzdik sait, «Tereń izdenis» — qazaq eliniń tarihyn nasihattaýshy úzdik sait, «Shynaiy ómir» – qoǵamdaǵy ózekti máselelerdi talqylaityn úzdik sait, «Sport tynysy» — salaýatty ómir salty men sportty nasihattaýshy úzdik sait, «Bilim bulaǵy» — bilim beretin úzdik sait, «Jastar álemi» — jastar taqyrybyna arnalǵan úzdik sait, «Aimaq ainasy» - úzdik aimaqtyq sait, «Balalarǵa bazarlyq» - balalarǵa arnalǵan úzdik sait, «Oiyn- saýyq» - úzdik oiyn-saýyq saity.
Árbir nominatsiia boiynsha jeńimpazǵa 385 myń teńge kóleminde aqshalai syilyq tapsyrylady. Baiqaý qorytyndysy osy jylǵy qarasha aiynyń sońynda shyǵady.
Baiqaý jeńimpazdaryn belgili qoǵam qairatkerleri, qalamger-jýrnalister men baiqaý quryltaishylarynan jasaqtalǵan qazylar alqasy anyqtaidy.
Qazylar alqasy saittardy mazmuny, qyzmet baǵyty, interaktivtiligi, kórkemdik jaǵy, ideia ereksheligi, tartymdylyǵy sekildi talaptar boiynsha saralap, jeńimpazdardy anyqtaidy.
Baiqaý erejesimen Qazaqstan Respýblikasy Tuńǵysh Prezidenti – Elbasy Qorynyń www.fpp.kz jáne Memlekettik tildi damytý qorynyń www.qazaq-found.kz saittarynan tanysýǵa bolady.
Baiqaýǵa ótinimder Memlekettik tildi damytý qorynyń info@qazaq-found.kz elektrondy mekenjaiyna 2017 jyldyń 11 qyrkúieginen 11 qarashasyna deiin jiberilýi tiis.
