Úiinde interneti joq almatylyq muǵalimder onlain sabaqty barlyq sanitarlyq talapty saqtai otyryp, mektepte ótkize alady, dep habarlaidy "Ult aqparat".
Almaty qalalyq Bilim basqarma basshysy Lázzat Jylqybaeva onlain brifing barysynda jańa oqý jylyna daiyndyq jumystary qalai júrgizilip jatqanyn aityp berdi.
Onyń aitýynsha, 1 qyrkúiekten bastap oqýshylar qashyqtan oqý formatynda bilim alady. Sondyqtan oqýshylardy tehnikamen qamtýǵa kóńil bólýde.
«Bul máseleni sheshý úshin mektepter jan basyna qarjylandyrý esebinen 9 120 noýtbýkpen qamtamasyz etiledi. Sondai– aq,mektepterdegi 10 myń noýtbýk ýaqytsha paidalanýǵa berildi. Jergilikti biýdjet esebinen 11 042, Úkimettiń rezerv qory esebinen 38 591 kompiýter tehnikasy alyndy. Onyń ishinde 4 016 kompiýter, 5 203 planshet jáne 29 372 noýtbýk bar. 22 212 planshet jergilikti biýdjet esebinen alyndy», - dep atap ótti Lázzat Jylqybaeva.
Sonymen qatar, ol oqýshylar men muǵalimderdiń internetke qoljetimdiligin sheshý kezeń-kezeńimen atqarylyp jatqanyn jetkizdi.
Internetke qosylýdy qajet etetin 22 myńnan astam oqýshyǵa sim kartalar satyp alyndy. Qazirgi tańda sim kartalar men roýterler taratylyp berildi. Interneti joq muǵalimderge mektepke kelip onlain sabaq ótkizýge ruqsat berildi. Osyǵan bailanysty qaladaǵy mektepterdiń barlyǵy dezinfektsiialyq quraldarmen qamtamasyz etildi. Odan bólek 1-2 synyptarda 193 kezekshi toptar ashyldy. Bul toptarda 1977 bala sabaq oqidy, - dedi ol.
