© almaty.tv
Almaty oblysyndaǵy Jaýǵashty aýylynyń turǵyndary aǵash kesetin zaýyttyń úzdiksiz shýyna jappai shaǵymdanyp jatyr, - dep habarlaidy Tengrinews.kz agenttigi Almaty.tv arnasyna silteme jasap.
Jergilikti turǵyn Elena Egotintseva kún saiyn tynyshtandyratyn dári ishýge májbúr.
"Úiimiz naǵyz tozaqqa ainaldy. Naǵyz tozaq. Nemereler kelgende, úide uiyqtai almaidy. Men narazylyq retinde bir kanistr benzin alyp, aǵash kesetin zaýytqa baryp, ústime quiyp órtep jibergim keledi. Ákimimiz sodan keiin bizge nazar aýdaratyn shyǵar. Óitkeni sheneýnikter bir sumdyq bolǵannan keiin ǵana nazar aýdarady", - dep shaǵymdandy aýyl turǵyny.
"Densaýlyǵymyzǵa ziian tigizip jatyr. Shańmen demalamyz, aǵash úgindisi ushyp jatyr. Osyǵan bailanysty balalarda allergiia belgileri bar. Bul jaǵdai uzaq ýaqyt boiy jalǵasyp keledi. Buǵan endi qansha shydaýǵa bolady?" - deidi aýyl turǵyny Samal Esenbaeva.
Jergilikti turǵyndardyń aitýynsha, úi mańynda aǵash óńdeý jumystary eki jyldan astam ýaqyt buryn bastalǵan. Aldymen kásipker bir aǵash kesý qondyrǵysyn ornatyp, odan keiin jarty jyl buryn ekinshisin satyp alǵan.
Halyq tynyshtyǵy shynymen buzylǵanyn tiisti organdar júrgizgen saraptama qujattary rastap otyr.
"Turǵyn úiler ishinde 45/60 detsibel, 47/62 detsibel. Negizgi norma - 45/55 detsibel. Joǵaryda aitylǵandardy negizge ala otyryp, departament jergilikti atqarýshy organnan óz quzyreti sheginde shara qoldanýdy suraidy", - dedi Almaty oblysy boiynsha Sanitarlyq-epidemiologiialyq baqylaý departamentiniń baspasóz hatshysy Áliia Shaǵiahmet.
Jergilikti bilik budan habardar ekenin, biraq qazir eshqandai shara qoldana almai otyrǵanyn aitady.
"Bul ispen ainalysatyn adamdarǵa aýdan basshylyǵy ruqsat bergen. Biz olardyń qyzmetin toqtata almaimyz. Turǵyndar sotqa aryz jazýy kerek", - deidi Mejdýrechinsk aýyldyq okrýgi ákimi apparatynyń zańgeri Qaiyrhan Jumekenov.
Kásipker aýyl turǵyndarymen sanasýǵa nietti emes. Aǵash óńdeý zaýytynyń iesi de jýrnalistermen sóileskisi kelmeidi.
"Men qujattardyń bárin kún saiyn kórshilerdiń aryz-shaǵymy boiynsha keletin tekserýshi organdarǵa kórsettim. Sizge kórsete almaimyn, óitkeni mindetti emespin", - dedi kásipker Larisa Doktorovich.
Jergilikti turǵyndar qujat boiynsha bári durys ekenine kúmándanyp otyr. Sondyqtan olar Sybailas jemqorlyqqa qarsy qyzmetke júginip, sotqa shaǵym túsirmek.
