Qyzylorda oblysynyń ákimi Qyrymbek Kósherbaev oblys ortalyǵyna qarasty Aqsýat aýyldyq okrýginiń turǵyny Jámilá Sádýovaǵa jańa páterdiń kiltin tabys etti, dep habarlaidy Baq.kz agenttigi.
Búgin «Aqmeshit-Syrdariia» meshitiniń aýlasynda dástúrli túrde ótetin «Júrek jylýy» qaiyrymdylyq sharasy uiymdastyryldy. Aktsiia barysynda turmysy tómen 1600-den asa otbasyǵa azyq-túlik úlestirildi.
Osy jiynda 9 qańtar kúni Aqsýat aýyldyq okrýgine qarasty Naýryz saiajaiyndaǵy úide kómirqyshqyl gazyna ýlanyp, qaza tapqan 3 balanyń anasy Jámilá Sádýovaǵa da baspananyń kilti tabystaldy.
«Jabyrqaǵannyń janynan tabylý, sharasyzǵa kómek qolyn sozý, qaiyrymdylyq jasaý – halqymyzdyń qanyna bitken asyl qasietterdiń biri. Ózderińiz bilesizder, osydan birer ai buryn, úsh birdei búldirshinimizden qapiiada kóz jazyp qaldyq. Bul qaiǵyly jaǵdai tek bir otbasynyń ǵana emes, tutas eldiń qabyrǵasyn qaiystyryp, eńsemizdi túsirdi. Biraq, Allanyń isine amal bar ma?! Halqymyzda "Qaiǵyny bólisseń azaiady..." degen sóz bar. Olai bolsa, sol úsh búldirshinimizdiń anasy Jámilá Sádýova qaryndasymyzǵa Syrdariia ózeniniń sol jaǵalaýyndaǵy jańa qaladan 2 bólmeli páterdiń kiltin tabystaǵaly otyrmyz», – dedi aimaq basshysy.
Sonymen qatar, az qamtylǵan 1600-den asa otbasyǵa azyq-túlik berildi. Azyq-túlik olardyń úilerine arnaiy kólikpen jetkiziledi. Oǵan kásipkerler men qoǵam belsendileri demeýshilik jasady. Aktsiia kezinde «Aqmeshit-Syrdariia» meshiti aýlasyna qaiyrymdylyq jáshigi qoiyldy. Saýapty iske úles qosqysy kelgender qarjylaryn jáshikke salyp jatty.
Budan bólek, apatty úiler men jataqhanalarda turatyn otbasylar «Orda» baǵdarlamasy aiasynda jańa páterge ie boldy.
Aita keteiik, eki jyl buryn oblysta «Orda» turǵyn úi qurylysyna baǵyttalǵan Jol kartasy ázirlengen edi. Baǵdarlama aiasynda 19 jylǵa deiingi 35 myńnan 43 myń teńgege deiin tólemmen, 20% aldyn ala tólemsiz 500 myń kepildik jarnasy arqyly páter alýǵa bolady.
Sondai-aq, 13 aqpanda ótken Qyzylorda oblysy ákiminiń eseptik kezdesýinde Qyrymbek Kósherbaev áleýmettik az qamtylǵan otbasylardy baspanamen qamtýǵa bailanysty arnaiy óńirlik baǵdarlama ázirleýdi tapsyrǵan bolatyn.
