Qazaqstan shahmat federatsiiasynyń prezidenti Ǵalym Qusaiynov pen onyń orynbasary Dármen Sádýaqasovtyń uiymǵa 3 mlrd teńge suratý úshin sportshylardy Prezident Ákimshiligi basshysynyń orynbasarymen kezdesýge alyp barǵan. Elimizdiń belgili shahmatshysy Bibisara Asaýbaeva osyndai málimdeme jasady, dep habarlaidy Ulysmedia.kz.
Asaýbaevanyń aitýynsha, keshe sportshylar Prezident ákimshiligi basshysynyń orynbasary Aida Balaevamen kezdesken. Qusaiynov pen Sádýaqasovtyń pármeni boiynsha delegatsiia quramyna er azamattar men quramanyń bas bapkeri P.M.Kotsýr kirmei, tek áielder quramasy enipti.
Sonymen qatar, shahmatshy kezdesý barysynda QShF basshysynyń ózin tanystyryp, atyn atamaǵanyna renish bildirdi.
“Atym atalmady, ózimdi sol jerde joq adamdai sezindim. Elenbegenim meili, komandadaǵy basqa qyzdarǵa laiyqty minezdemelerin berdi. Eń sońǵy minýtqa deiin bizdi Olimpiada oiyndary úshin ministrmen kezdesýge alyp kele jatqanymyzǵa senimdi boldym. Sóitsem, Dármen Sádýaqasov pen onyń basshysy Qazaqstandyq shahmat federatsiiasynyń biýrokrattary úshin 3 milliard teńge suraýǵa alyp kelgen eken. Osy uiatsyz spektakldiń qatysýshysy bolǵanym úshin uialyp turmyn. Búgin basty daiyndyq boldy. QShF basshylyǵy erteń el Prezidenti Qasym-Jomart Kemelulymen kezdesýge premeralyq kórsetilimdi daiyndap jatyr”, – dep jazdy Asaýbaeva Instagram paraqshasynda.
Sondai-aq, sportshy óz renishiniń Aida Balaevaǵa qatysy joq ekenin atap ótip, Prezident ákimshiligi basshysynyń orynbasaryna ýaqyty pen kóńilin bólgeni úshin alǵys aitty.
“Men úshin bul – óte uiat jaǵdai. Sol úshin keshirim suraimyn. Men – sportshymyn. Sportshy bolyp qalǵym keledi. Men chempiondardan "qaiyrshy" jasaýǵa tyrysatyn adamdardyń áreketinen uialýdamyn. Federatsiia Prezidenti men vitse-prezidentin moiyndaýdan bas tartamyn. Qazaqstan quramasynyń múshesi, shahmatshy jáne jedel shahmattan qazirgi álem chempiony retinde federatsiiaǵa 3 milliard teńge qajet emes ekenin málimdeimin. Ol qarajat Jańa Qazaqstanǵa kerek ekenine senimdimin", – dedi shahmatshy.
