«Nurly jer» baǵdarlamasymen úi almaq bolyp, aldanyp qalǵan aqtóbelikter prokýratýraǵa aryzdandy, dep habarlaidy QazAqparat tilshisi.
Búgin bir top aqtóbelik páter alyp berýge ýáde etken «Capital to life» kompaniiasynyń keńsesine taǵy bardy. Keibiri 3-4 aidan beri júrse, aldy 1 jyl boiy aqshasyn daýlap, ala almai álek. Olardyń sózinshe, kompaniia basshylyǵy «Nurly jer» memlekettik baǵdarlamasy boiynsha úi alyp bermek bolǵan.
«Capital to life» kompaniiasyna aqsha salyp, óz qarjysyn qaitara almai júrgen 18 adam birikti. Bizder áleýmettik jelige shyqqan jarnamany kórdik. Onda nesie tarihyna, ailyq tabysyna qaramai, «Nurly jer» baǵdarlamasy boiynsha páter qunynyń 35 paiyzyn jinaýǵa keńes berildi. Páterdi ózimiz tańdaimyz. 8-10 jylǵa 7-10 paiyzdyq ústemeaqymen nesie beriletin boldy. Men 3,5 million teńge turatyn úidi taptym. Ózimniń 1 million 400 myń teńge aqshamdy saldym. Ekinshi deńgeili bank arqyly JShS-niń direktory Janat Esniiazovanyń esepshotyna aqsha aýdardym. Kelisimshart boiynsha eki aidan keiin páterge ie bolatynymyzdy aitty. Qolymda múgedek ákem bar», - dedi zardap shekken Jibek Imanǵazieva.
Arman Sovetov bolsa 2018 jyldyń qarasha aiynda «Capital to life» JShS-ne 1,5 million teńge aqsha aýdarǵan.
«Ózim Qandyaǵash qalasynda turamyn. Kompaniiaǵa 1,5 million teńge, páter iesine 1 million teńge aqsha berdim. Qaladaǵy úi 5 million 200 myń teńgege eseptelip edi. Men keńsege kúnde kelemin, aqshamdy qaitarǵym keledi. Memlekettik baǵdarlamaǵa uqsas degen soń keldim. Eki aida baspanaly bolasyń degen usynys unady. Sońynda ózim páter jaldap, eki shyǵynǵa batyp júrmin», - dedi Arman Sovetov.
Al «Capital to life» kompaniiasynyń jetekshisi Janat Esniiazovanyń aitýynsha, baǵdarlamanyń ataýy «Nurly úi» jáne ol jekemenshik joba. Qazir úsh salymshy sotqa, prokýratýraǵa aryz túsirgen.
«Kelisimshart boiynsha aqsha 60 kúnde qaitarylady. Biraq sotqa aryz jazǵan adamdar sot sheshimin kútedi. Bul memlekettik kompaniia emes, jeke investorymyz bar. «Nurly úi» baǵdarlamasy ózimizge tiesili», - dedi ol.
Aita keteiik, «Capital to life» JShS-ǵa aqsha salyp, qaitara almai júrgen salymshylar búgin oblystyq prokýratýraǵa taǵy aryz qaldyrdy.
«Turǵyndar birinshi ret oblystyq prokýratýraǵa keldi. Aitýlarynsha, 2 aqpan kúni Aqtóbe qalalyq prokýratýrasyna aryz jazǵan eken. Qalalyq prokýratýra isti oblystyq politsiia departamentine jibergen. Is qozǵalmaidy degen shaǵym bar. Biz turǵyndardyń shaǵymyn qabyldap, tekserý júrgizemiz. Aryz 15 kúnde qaralady», - dedi oblystyq prokýratýranyń apparat jetekshisi Jasulan Orynbasaruly.
