QR Premer-Ministriniń birinshi orynbasary Roman Skliar ýtil alymy týraly pikir bildirdi, dep habarlaidy QazAqparat.
«Naýryz aiynda aitqanymdai, bul máselege tereńirek qaraý kerek. Bul kimge tiimdi? Bul eń az jumys ornyn quratyn, eshbir salyqty tólemeitin importtaýshylarǵa paidaly. Taǵy da qaitalap aitamyn, óitkeni bul taqyryp qaitadan kóterilip otyr. Mysaly, aýylsharýashylyq tehnikasyn shyǵaratyn muhittyń ar jaǵyndaǵy bir kompaniia taýaryn bizge jiberedi, biraq ony jyldar boiy basqa eýropalyq kompaniia satyp keledi. Olar qansha salyq tóleidi? Biz Petropavlda óndiris ashqan basqa da kompaniialar bar dep aitamyz. Bul sonshalyqty qymbat emes, biraq olar muny jasaǵysy kelmeidi, óitkeni olar úlken marjasyn joǵaltyp jatyr», - dedi Roman Skliar Úkimet otyrysynan keiin tilshilerge bergen suhbatynda.
Onyń aitýynsha, ónerkásiptik qurastyrý týraly zańda el aýmaǵynda ornalasqan zaýyt mashina jiyntyǵyn tek óndirýshi zaýytynan satyp alýy qajettigi jazylǵan.
«Onyń barlyq quny ashyq kórsetilýi kerek. Importtaýshy ónimdi ákelgende onyń baǵasyn túsine almaimyz, óitkeni ol birneshe deldaldardan ótken, qansha qosqanyn, qalai satatynyn bilmeimiz. Aiyrmashylyq osyda. Importtaýshy qansha jumys ornyn qurady jáne otandyq qurastyrýshy kásiporyn qansha jumys ornyn qurady – aiyrmashylyq bar. Mine, másele osynda», - dedi Skliar.
