Ustazdar kúni qarsańynda Nur-Sultan turǵyndary qonys toiyn toilap jatyr! Páter kiltterin kezekte turǵan qala turǵyndarynyń bir bóligi, sondai-aq halyqtyń áleýmettik osal toptary sanatyndaǵy azamattardyń kezekti bóligi aldy. «Nurly jer» memlekettik baǵdarlamasy aiasynda «Otaý» kóppáterli turǵyn úi kesheni qoldanysqa berildi, dep habarlaidy elorda ákimdiginiń resmi saity.
Elorda ákiminiń orynbasary Nurlan Nurkenov «Otaý» kóppáterli turǵyn úi keshenindegi páterlerdiń kiltin tabys etti.
«Muny turǵyn úi kesheni degennen góri shaǵyn aýdan desek te bolady. Bul aýmaqta kelesi jyly jańa mektep boi kóteretin bolady. Qazirdiń ózinde jańa avtobýs baǵyty uiymdastyryldy. Balabaqsha, meditsinalyq ortalyq sekildi basqa da áleýmettik mańyzdy uiymdar boi kóteredi. Abattandyrý jumystary júrgiziledi. Iaǵni turǵyndardyń qolaily ómir súrýine barynsha jaǵdai jasalady», – dedi elorda ákiminiń orynbasary Nurlan Nurkenov.
Búgin qonys toiyn toilap jatqandardyń biri – elordadaǵy «№65 mektep-gimnaziiasynyń oqytýshysy Aǵila Ǵaniqyzy.
«Qaladaǵy záýlim kópqabatty úilerdi kórip, «Shirkin, meniń de óz baspanam bolsa ǵoi» dep qatty armandaitynmyn. Niet etseń, túbi jetesiń ǵoi. Endi búgin, mine, páterge qol jetkizdim», – deidi jas ustaz qýanyshtan júzi bal-bul janyp.
Memleket basshysynyń tapsyrmasy boiynsha elordada qoljetimdi jeńildikti turǵyn úi kólemin ulǵaitý boiynsha júieli jumys júrgizilýde. Biyl Nur-Sultanda 10 myń jeńildikti áleýmettik páter salynady. Tek sońǵy 3 jylda qoljetimdi turǵyn úi sany 5,5 eseden astam ulǵaidy.
Mysaly, 2018 jyly 1800 áleýmettik páter, 2019 jyly 2 900 áleýmettik páter, 2020 jyly 7 000-nan astam páter salynyp, paidalanýǵa berildi.
Sondai-aq, Elbasynyń bastamasymen qolǵa alynǵan «Jumys isteitin jastarǵa jalǵa beriletin turǵyn úi» baǵdarlamasy biyl da jalǵasady.
