Jýyrda Ninety one toby úsh jyldyq mereitoilaryn atap ótip, elimizdiń 16 qalasynda kontsert berdi. Almatydaǵy keshke kelgen ata-analardyń biri óziniń atalǵan topty erekshe jaqsy kóretinin ári osy toptyń arqasynda balalarynyń jaqsy tárbie alyp jatqanyn aityp ótti, dep habarlady Sputnik Astana arnasynyń "El aýzynda" baǵdarlamasyna silteme jasap.
Ustaz Ninety one tobynyń shyǵarmashylyǵyna alǵashqy kúnnen beri tańdana qaraǵanyna toqtaldy.
"Ninety one toby alǵash shyǵa salǵan kúnnen bastap biz úshin qyzyq ári jumbaqqa toly boldy. Olardyń obrazdary men ánderi erekshe unaidy. Jigitter aldaryna qoiǵan maqsattaryna jete biledi jáne prodiýserleri de tamasha adam. Olardy kóp ýaqyttan beri bilemiz", — dedi ol.
Ári qarai ustaz óziniń de bul toptyń erekshe jankúieri ekenin aityp ótti. Osy kúnge deiin bolǵan barlyq kontsertine barǵan eken.
"Meniń qyzym bul topqa jankúier bolýǵa ózge jastardy da shaqyrdy. Iaǵni ózimizdi eaglez-dar qataryna jatqyzamyz. Bul topqa qatysatyn barlyq sharadan qalmaimyz. Ózim №34 mektep-gimnaziiada jumys isteimin", — dedi ustaz.
Jankúierler toptyń kontsertine qury qol kelmeidi. Barlyǵynyń qolynda syilyq bar. Balalarymen birge jankúier bolyp júrgen ustaz toptyń bala tárbiesine qalai áser etetinine toqtaldy.
"Ninety one ánderiniń arqasynda balam qazaq tilin biledi. Sondai-aq, osy jigitterdiń arqasynda qyzymnyń shyǵarmashylyǵy óte jaqsy damyp keledi. Sebebi, sýretteri osy top jigitterine arnalǵan. Kópten beri sýret salyp, olarǵa shetinen syilap jatyrmyz. Birge aparyp bergen kúnderimiz de boldy. Búgin de árbir soliske syilyq ákelip turmyz. Arasynda qoldan jasalǵan syilyqtarymyz da bar", — dedi ata-ana.
