Kórneki sýret: Pexels.com
Kezinde eń tómen ball alǵandar muǵalimdikke baratyn. Bul týraly ministr Ashat Aimaǵambetov aitty. Qazir bul tájiribe artta qaldy. Kerisinshe, muǵalimdikke barǵysy keletin jastardyń sany azaiyp keledi. Nátijesinde sanaly túrde baratyndardyń sapasy artty.
Prezident osyǵan deiin de istelgen reformalar, muǵalimniń mártebesin arttyrý boiynsha jumysty jalǵastyrý kerek dep Úkimetke tapsyrma berdi. Iaǵni elimizdiń kadrlyq áleýetin birtindep arttyrý kerek. Bul iste orta bilim berý júiesi mańyzdy ról atqarady.
«Ustazdar – ulttyń ziiatkerlik qýaty. Olar bilimdi urpaq tárbieleý arqyly elimizdiń órkendeýine jol ashady. Úzdik oqý baǵdarlamasy, zamanaýi mektepter, ozyq basqarý júiesi bolsa da, ustaz bilikti bolmasa, onyń bári beker ekeni anyq. Sondyqtan pedagogikalyq joǵary oqý oryndaryna talapty, qabiletti jastardy qabyldaýǵa basa mán berý kerek», - degen edi Memleket basshysy halyqqa Joldaýynda.
Bilim berý júiesiniń tabystylyǵynyń negizgi kórsetkishteriniń biri – pedagogikalyq kadrlardy daiarlaý. Mysaly Finliandiiada muǵalim mamandyǵy eń qurmetti jáne suranysqa ie mamandyqtardyń biri. Sonymen qatar, olar eń qatań irikteýden ótkennen keiin ǵana mektep muǵalimi bolýǵa múmkindik alady. Mektepti úzdik bitirgen oqýshy bolashaqta múǵalim mamandyǵyn tańdaidy. Eń joǵarǵy jalaqyny da muǵalimder alady. Ortasha eseppen 1 million teńgeden bastalady. Munda jekemenshik, ne bizdiń tilmen aitqanda «elitalyq» mektep degen ataý múlde joq. Barlyq oqý orny birdei múmkindikke ie. Mektepte oqýshynyń ómirine qajetti dúnieler ǵana oqytylady. Elde bilim berý baǵdarlamasy biryńǵai júiege túsken. Qandai ádispen oqytýdy ustaz ózi tańdaidy. Sondyqtan bir orynǵa – 15 muǵalim talasady.
Al bizdiń elde jaǵdai basqasha. Biz bilimi men ǵylymy órkendegen elderdiń tájiribesin endi ǵana qoldana bastadyq.
