Qazaqstan Respýblikasynda tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasy aiasynda Qazaqstan Respýblikasy Mádeniet jáne sport ministrligi Tilderdi damytý jáne qoǵamdyq-saiasi jumys komiteti men Shaisultan Shaiahmetov atyndaǵy tilderdi damytýdyń respýblikalyq úilestirý-ádistemelik ortalyǵy uiymdastyrǵan shara óz deńgeiinde ótti. Astana, Almaty qalalary men aimaqtyq irikteýden súrinbei ótken saiyskerler búgin «Baldáýren» respýblikalyq oqý-saýyqtyrý ortalyǵynda bilimderin tarazylady. 18-20 jas aralyǵyndaǵy qazaq, orys, aǵylshyn tilderin igergen jastardyń bilimin arnaiy qurylǵan qazylar alqasy baǵalady. Qazylar alqasy quramynda akademik, E.A. Bóketov atyndaǵy Qaraǵandy memlekettik ýniversitetiniń Qazaq ádebieti kafedrasynyń professory, filologiia ǵylymdarynyń doktory Jandos Smaǵulov, L.N. Gýmilev atyndaǵy Eýraziia ulttyq ýniversitetiniń Shetel tilderiniń teoriiasy jáne tájiribesi kafedrasynyń dotsenti, pedagogika ǵylymdarynyń kandidaty Jainash Nurjanova, L.N. Gýmilev atyndaǵy Eýraziia ulttyq ýniversitetiniń Qazaq til bilimi kafedrasynyń dotsenti, filologiia ǵylymdarynyń kandidaty Saltanat Shoqabaeva, Sh.Ýálihanov atyndaǵy Kókshetaý memlekettik ýniversitetiniń Orys filologiiasy jáne kitaphana isi kafedrasynyń jetekshisi, filologiia ǵylymdarynyń kandidaty Gúlnara Fatkieva, Sh.Ýálihanov atyndaǵy Kókshetaý memlekettik ýniversitetiniń Oqý-ádistemelik jáne aǵylshyn tili kafedrasynyń dotsenti, filologiia ǵylymdarynyń kandidaty Ainagúl Ismaǵulova bar.
Olimpiada erejesine sai qatysýshylar úsh kezeń boiynsha tapsyrma oryndady. Olar alǵashqy ainalymda berilgen taqyryptardyń úsh tilde mazmunyn ashsa, ekinshi kezeńde ilespe aýdarma jasady. Alǵashqy eki ainalymda úsh tildi bilý deńgeilerin kórsetse, sońǵy saiysta qazaq tilinde berilgen taqyrypqa esse jazdy.
- Aýqymdy uiymdastyrylyp otyrǵan bul sharanyń maqsaty - qazaq tilin, orys, aǵylshyn tilderin joǵarǵy deńgeide biletin jastar sanynyń artýyna yqpal etip, qazirgi jasampaz Qazaqstannyń úsh tuǵyrly tildi damytý baǵdarlamasynyń oryndalýyna jaǵdai jasaý. Jáne ózge tilderdi meńgergen jastarymyz arqyly qazaq tiliniń qoldanys aiasyn keńeitý. Ilespe aýdarma jasaityn kásibi mamandar sanyn arttyrý bolyp otyr. Sondyqtan jastarymyzdyń bilim deńgeiin baǵalap, olardy yntalandyratyn mundai jarystar jii bolyp tursa artyq etpeidi,- deidi qazylar alqasynyń tóraǵasy Jandos Smaǵulov.
Olimpiada qorytyndysy boiynsha, bas júldeni Álibek Marat jeńip aldy. Úsh tapsyrmany da tiianaqty oryndaǵan ol qazylar sheshimimen naǵyz poliglot atandy. Al birinshi oryn qyzylordalyq Aidana Abýbakirovaǵa buiyrdy. Ekinshi oryndy Kámila Ahmetova enshilese, úzdikter qataryn Gúlmira Kamenova men Ekaterina Bobka tolyqtyrdy.
-Úsh tuǵyrly til saiasatyn júieli júrgizý úshin jastarymyzdyń yqylasyn til úirenýge aýdarý kerek. Sonda ǵana Qazaqstan básekege beiim, aǵylshyn tilin meńgergen, ǵylymnyń sai salasynda bolsyn qajetti aqparatyn qoljetimdi ala alatyn jastarymen maqtanatyn bolady. Búgingi baiqaý joǵarǵy deńgeide ótti. Ár aimaqtyń úsh tildiń jiligin shaǵyp, maiyn ishken jastar kelgen. Sondyqtan olardyń árbiri jeńimpaz, - deidi jarys júldegeri Aidana Shynbolatqyzy.
Iá, uiymdastyrýshylar ózge qatysýshylardy umytpady. Ainela Qojaqmetova men Nurgúl Seidahmetke yntalandyrý syilyǵy tabystalyp, ózge qatysýshylar Alǵyshattarmen marapattaldy. Júldegerlerge qarjylai syilyq berildi. Saltanatty shara merekelik kontsertpen jalǵasty.
