© Photo: Týrizm jáne sport ministrliginiń baspasóz qyzmeti
Qazaqstandyq mergender Ásem Orynbai men Edýard Eshenko Hanchjoý qalasynda ótip jatqan HIH jazǵy Aziia oiyndarynda, stendtik atý týrniriniń aralas juptyq saiysynda altyn medal jeńip aldy, - dep habarlaidy "Ult aqparat".
"Skit" jattyǵýynyń finalynda qazaqstandyqtar Kýveitten kelgen qarsylastarynan (Eman Álshamaa men Abdýlla Ál-Rashidi - red.) basym tústi. Qorytyndy esep – 40:35.
Bul - ulttyq qurama qorjynyna túsken úshinshi altyn medal.
Esterińizge salaiyq, keshe Ásem Orynbai, Zoia Kravchenko jáne Olga Panarinadan jasaqtalǵan Qazaqstannyń áielder komandasy "skit" jattyǵýynda jeńiske jetip, Aziia oiyndarynyń rekordyn ornatty. Al jekelei synda Ásem Orynbai qola júldege ie boldy. Sondai-aq búgin taǵy bir otandasymyz Zýhra Irnazarova 10 metr qashyqtyqtan jyljymaly nysanaǵa oq atý saiysynda úzdik shyqty.
"Bizdiń mergender taǵy da keremet nátije kórsetti! Sportshylardy, jankúierlerdi jáne, árine, komandanyń jattyqtyrýshylar shtabyn osy jeńispen quttyqtaimyn. Búkil el mergenderimizben maqtanady. Bul jeńis myńdaǵan qazaqstandyq jetkinshekterdi osy sport túrimen ainalysýǵa shabyttandyratynyna senimdimin", - deidi Týrizm jáne sport ministri Ermek Marjyqpaev.
Aita keteiik, Ásem Orynbai men Edýard Eshenko birqatar halyqaralyq básekede birge sátti óner kórsetip, elimizge tarihi júlde syilap úlgergen.
Atap aitar bolsaq, biyl mamyrda Almatyda ótken reitingtik Álem kýbogynda olar kúmis júldeger atandy. Al jazda Italiiadaǵy Álem kýbogynda aralas juptar arasynda 3-oryn alǵan. Sondai-aq byltyr qazan aiynda Horvatiianyń Osiek qalasyndaǵy álem chempionatynda Ásem Orynbai men Edýard Eshenko skit baǵdarlamasynda qola júldege qol jetkizgen.
