«Qazaeronavigatsiia» RMK Almaty mańynda «Bek Eir» áýe kompaniiasyna tiesili ushaqtyń apatqa ushyraýyna qatysty aqparat taratty, dep habarlaidy "Ult aqparat".
«Qazaeronavigatsiia» RMK Almaty mańyndaǵy ushaq apatynan kóz jumǵandardyń týǵan-týystaryna kóńil aita otyryp, zardap shekkenderge tezirek saýyǵýyn tileidi. Qazirgi tańda BAQ-ta «Bek Eir» ushaǵynyń buryn ushyp shyqqan áýe kemesiniń baǵyttas izine túsip ketkeni týraly aqparat tarady. «Qazaeronavigatsiia» RMK tarapynan atalmysh áýe apatynyń tuspaldy sebepterine qatysty pikir bildirý kózdelmegen. Alaida joǵaryda atalǵan ári shyndyqqa janaspaityn aqparatty oqi otyryp, kelesi jaidy baian etýge týra kelip tur: Fokker-100 áýe kemesi jáne onyń aldynda ushyp ketken Aerobýs A-321 ushaǵy 136 tonnalyq salmaqty kótere alady. Tiisinshe, orta deńgeidegi áýe kemesi sanalady. Qazaqstan Respýblikasy kólik jáne kommýnikatsiia ministriniń 2011 jyldyń 16 mamyryndaǵy Áýe qozǵalysyna qyzmet kórsetýdi uiymdastyrý týraly №279 Nusqaýlyǵynyń 186-bóliginde kórsetilgendei, bir ushý-qoný jolaǵynan orta deńgeidegi áýe kemeleriniń minimaldy ushyp shyǵý boiynsha ýaqyt aralyǵy 1 minýtty quraidy», - delingen habarlamada.
Kompaniianyń habarlaýynsha, Qazaqstan Respýblikasynda bekitilgen aralyqtar jalpyálemdik talaptar men standarttarǵa sai keledi. Halyqaralyq áýejailarda da ushyp shyǵý men qoný aralyqtary dál osyndai tártippen belgilengen.
«Obektivti baqylaý quralynyń materialdaryna sáikes, joǵaryda atalǵan áýe kemeleriniń ushyp shyǵý aralyqtary 2 minýt bolǵan. Tiisinshe, atalǵan ushaqtardyń ushyp shyǵý aralyǵynda ýaqyt intervaly boiynsha eshqandai buzýshylyq bolmaǵan», - delingen habarlamada.
Aita keteiik, 27 jeltoqsan kúni Almatydan Nur-Sultan qalasyna ushyp shyqqan ushaq radardan joǵalyp ketti.
Keiin 93 jolaýshysy jáne 5 ekipaj múshesi bar ushaqtyń apatqa ushyraǵany málim boldy. Oqiǵanyń mán-jaiyn anyqtaý úshin ushaq qulaǵan aýmaqqa arnaiy komissiia ushyp shyqty. Osy apatqa qatysty shuǵyl jeli iske qosylǵan.
QR Prezidenti Qasym-Jomart Toqaev ushaq apatyna kináliler zańǵa sáikes qatań jazalanatynyn málimdedi. Elbasy Nursultan Nazarbaev jolaýshylar ushaǵynyń apatqa ushyraýyna bailanysty kóńil aitty.
