FlyArystan áýe kompaniiasynyń ushaǵynda Mańǵystaý oblysynyń turǵyny shý shyǵarǵan. 25 jastaǵy jigit buzaqylyq jasaǵany úshin ákimshilik kodekstiń úsh baby boiynsha jaýapkershilikke tartyldy, dep habarlaidy "Ult aqparat".
Áýe kompaniiasynyń habarlaýynsha, 24 qyrkúiek kúni Almatydan Aqtaýǵa ushaq ushyp shyqqan. Sapar barysynda jolaýshylardyń balaǵat sóz aityp, janyndaǵy adamdar men ekipaj músheleriniń mazasyn alǵan. Borttaǵylardyń eskertýin de qulaǵyna ilmegen.
«Almaty – Aqtaý baǵytynda ushyp bara jatqanyna qaramastan jolaýshy Shymkentke barýy kerektigin aityp, aiǵailai bastaǵan. Tipti ushaqtyń esigin ashýǵa talpynǵan. Sonymen birge, ol borttaǵy áiel qyzmetkerdi qylqyndyra bastaǵan. Muny kórgen borttaǵy er adamdar júgirip kelip, shý shyǵarǵan jigitti ustap, tártipke keltirgen. Aqtaýǵa jetkennen keiin ol jolaýshy politsiiaǵa tapsyryldy», - dep habarlaidy áýe kompaniiasynan.
Shý shyǵarǵan jolaýshyny tyrp etkizbei ustaǵan jigitter – Nurlan Bohanov pen Manas Turabekov atty sportshylar bolyp shyqty. Olarǵa alǵys retinde FlyArystan kompaniiasy ushaqtyń modeli men bilet, áýe kompaniianyń qyzmetin satyp alatyn vaýcherlerdi berdi.
Al Kóliktegi politsiia departamenti 25 jastaǵy jigittiń ustalǵanyn habarlady.
«Kóliktegi politsiia departamentiniń qyzmetkerleri ushaq jolaýshysyn ákimshilik kodekstiń úsh baby boiynsha aiypqa tartty: áýe kemesindegi erejeni buzý, qoǵamdyq orynda mas bolyp, alkogoldik ishimdik ishý jáne usaq buzaqylyq», - dedi vedomstvodan.
Shý shyǵarǵan jigitke 8 AEK (22 224 teńge) kóleminde aiyppul salynǵan. Usaq buzaqylyq baby boiynsha onyń isi sotta qaralýda.
