Nur-Sultan áýejaiynda jolaýshylar Air Astana ushaǵyndaǵy oryndaryn áýe kemesi apatynan zardap shekkenderdiń týystaryna berdi. Bul týraly Air Astana áýe kompaniiasynyń kiristerdi basqarý jónindegi direktory Erbolat Baisalyqov aitty, dep habarlaidy "Ult aqparat".
«Biz osy táýliktiń ishinde zardap shekkender men qaza tapqandardyń jaqyn týystary bolyp keletin 33 jolaýshyny jetkizdik. 19 adamdy búgin tańerteńgi 05:00-de alyp kettik. Búgin 11 balanyń anasyn jiberdik. Onyń bir balasy áýe apatynan zardap shekti, 10 balasymen ushyp ketti. Iaǵni, bizde adamdardyń sany boiynsha shekteý joq. Barlyq jaqyn týystary usha alady. Sonymen qatar Nur-Sultan áýejaiynyń dárigerine de birge ushýdy ótindik», - dedi ol.
Onyń aitýynsha, áýejaida ushaq apatynan zardap shekkenderge óz oryndaryn bergen jolaýshylar da boldy.
«Qazirgi ýaqytta zardap shekkenderdiń nemese qaza tapqan adamdardyń týǵan-týystary úshin óte aýyr ekendigin túsinýimiz kerek. Sondyqtan osyndai qadamǵa baryp, olardy tegin tasymaldadyq. Jańa jyl qarsańynda barlyq reister tolyq. Sol sebepti Nur-Sultan áýejaiynyń tirkeý ornynan, halyq aldyna shyǵyp, jolaýshylardan zardap shekkenderdiń týystary úshin oryn berýdi ótindik. Baqytymyzǵa orai, ondai jolaýshylar tabyldy. Olarǵa zor rizashylyǵymyzdy bildiremiz», - dedi Erbolat Baisalyqov.
