Almatyda ushaq apatynan zardap shekkenderdiń densaýlyǵyna bailanysty jaǵdaidy qalalyq Qoǵamdyq densaýlyqty saqtaý basqarmasynyń basshysy Tileýhan Ábildaev aityp berdi, dep habarlaidy QazAqparat.
Onyń aitýynsha, barlyǵy 66 adam qalalyq jáne oblystyq aýrýhanaǵa jetkizilgen.
«Almatyda jedel járdem brigadalary 66 adamdy jetkizgen. Onyń ishinde 50 adam aýrýhanalarǵa jatqyzyldy. №4 klinikalyq aýrýhanaǵa - 19 adam, qalalyq shuǵyl meditsinalyq kómek kórsetý aýrýhanasyna - 13 adam, ortalyq qalalyq aýrýhanaǵa - 3 naýqas jetkizildi. Al Balalarǵa shuǵyl meditsinalyq kómek kórsetý ortalyǵyna 9 bala jetkizildi. Almaty oblystyq kóp profildi klinikalyq aýrýhanasyna 6 naýqas jatqyzyldy», - dedi Tileýhan Ábildaev.
Basqarma basshysy barlyq naýqastardyń emine qajetti dári dármek jetkilikti ekenin aitty.
«Qazir naýqastar qajetti dári dármekpen qamtylyp otyr. Bári jetkilikti. Astanadan kerekti mamandardy jumyldyrýǵa Respýblikalyq sanaviatsiia qyzmeti daiar. Neirohirýrg, basqa da mamandardy shaqyratyn bolamyz», - dedi basqarma basshysy.
«Balalardyń barlyǵy esin biledi. Keibireýlerine shuǵyl ota jasaý kerek. Súiekteri synǵan. Qalalyq shuǵyl meditsinalyq kómek kórsetý aýrýhanasyna, qalalyq ortalyq aýrýhanaǵa jetkizilgen naýqastar jeńil jáne orta dárejeli jaraqat alǵan», - dedi ol.
