QR Eńbek jáne halyqty áleýmettik qorǵaý ministri Birjan Nurymbetov Almaty túbinde áýe apatynan qaza tapqandarǵa ótemaqy qashan beriletinin aitty, dep habarlaidy "Ult aqparat".
«Úkimet 4 mln teńgeden tólem jasaý týraly sheshim qabyldady. QR Eńbek jáne halyqty áleýmettik qorǵaý ministrligi tiisti qaýly jobasyn ázirlep, búgin oǵan daýys berdik. Bul qarajat qaza tapqandardyń otbasy músheleriniń jeke esepshotyna aýdarylady», - dedi ministr Úkimet otyrysynan keiin BAQ ókilderine bergen suhbatynda.
Sonymen qatar ol ushaq apaty nan zardap shekkenderge ótemaqy tóleý máselesin jergilikti atqarýshy organdar sheshetinin aitty.
«Eger zardap shekkenderge qatysty materialdyq sipatta qandai da bir ótemaqy bolatyn bolsa, onda muny oqiǵa oryn alǵan jerdegi jergilikti bilik, iaǵni, Almaty qalasy men Almaty oblysynyń ákimdigi sheshedi. Úkimet deńgeiinde qaza tapqandardyń týystaryna ǵana 4 mln teńgeden ótemaqy tóleý týraly sheshim qabyldandy», - dedi ol.
Ministr ótemaqy qashan tólenetinin de aitty.
«Ótemaqy tóleý merzimine qatysty aitar bolsam, apat 27 kúni bolyp, 28 kúni ótemaqy tóleý týraly sheshim qabyldandy. Búgin Úkimet otyrysynda daýys berildi jáne búgin aqsha Eńbek ministrligine beriledi. Biz qysqa ýaqyttyń ishinde aqshany jeke esepshottarǵa aýdaramyz», - dedi Birjan Nurymbetov.
