QR Bas prokýrory Qairat Qojamjarovtyń tóraǵalyǵymen Quqyq qorǵaý organdarynyń úilestirý keńesiniń otyrysy ótti. Onda esirtki qylmystaryna qarsy kúres jáne urlanǵan aktivterdi qaitarý máseleleri qaraldy, dep habarlaidy "Ult aqparat" QR Bas prokýratýrasyna silteme jasap.
Keńes otyrysyna Prezidenttiń Kómekshisi - Qaýipsizdik Keńesiniń Hatshysy Ǵabit Baijanov, Úilestirý keńesiniń músheleri, Prezident Ákimshiligi men memlekettik organdardyń ókilderi qatysty. Otyrysta qylmys arqyly memleketke keltirilgen zalaldy óteý jáne shetelden urlanǵan aktivterdi qaitarý boiynsha qabyldanyp jatqan sharalar qaraldy. «2015 jyldan bastap urlanǵan aqshalai qarajattyń tek 17% ǵana ótelgen. Tergeý organdarynyń qyzmeti kúdiktilerdiń aktivterin izdeýge jáne qamaýǵa alýǵa baǵyttalmaǵany aityldy. Prokýrorlar iriktep tekserý arqyly óz aktivterin satqan jáne shyǵarǵan qylmyskerlerdiń múlkine tyiym salmaýdyń 86 faktisin anyqtady», - delingen habarlamada.
Adamdar jaýaptylyqtan bosatylǵan qylmystyq ister boiynsha tiisti talap-aryz jumysy joq.
Osyǵan bailanysty, Bas rokýror quqyq qorǵaý organdarynyń atyna urlanǵan qarajatty anyqtaý jáne memleket pen azamattarǵa qaitarý boiynsha sharalar keshenin qabyldaý týraly tiisti nusqaý ázirleýdi tapsyrdy.
Ol ýákiletti vedomstvolardy da qylmystyq aktivterdi izdeý men tutqyndaýdyń ozyq ádisterin, onyń ishinde sheteldik áriptesterdiń qarjylyq barlaý bólimsheleriniń málimetterin paidalana otyryp, olardy neǵurlym belsendi qoldanýǵa shaqyrdy. Ádilet ministrligine boryshkerlerdiń múlkin avtomatty túrde tekserý úshin IT-júiesin jetildirýdi jedeldetý, sondai-aq sot oryndaýshylarynyń jaýapkershiligin arttyrý mindeti qoiyldy.
Otyrys qorytyndysy boiynsha Úilestirý keńesiniń 2019 jyldyń 1-jartyjyldyǵyna arnalǵan jumys jospary bekitildi, onda Memleket basshysynyń tapsyrmalarynan týyndaityn jáne azamattardyń quqyqtaryn qorǵaýǵa bailanysty ózekti máseleler kózdelgen.
