Semei aimaǵynda Abai oblysy, burynǵy Jezqazǵan oblysynyń aimaǵynda Ulytaý oblysy qurylady. Sondai-aq Almaty oblysynyń qazirgi territoriiasy ekige bólinip, eki oblys bolmaq. Bul týraly prezident Qasym-Jomart Toqaev málimdedi, dep habarlaidy Sputnik Qazaqstan.
"Eń aldymen Semei aimaǵynda Abai oblysyn qurýdy usynamyn. Semei qalasy jańa oblystyń ortalyǵy bolady. Osy máseleni aimaq turǵyndary kópten beri aityp júrgenin bilemin. Qazir ol jaqta sheshimin tappaǵan túitkilder az emes. Mysaly aimaqtyń ishki infraqurylymy ábden tozǵan. Kezinde Alash arystarynyń basyn qosqan Semei qalasynyń jaǵdaiy da máz emes. Biz tarihi ádildikti ornatyp, ulylarymyz dúniege kelgen kieli ólkeni qaita jańǵyrtýǵa tiispiz", - dedi prezident halyqqa joldaýynda.
Sondai-aq burynǵy Jezqazǵan oblysynyń aimaǵynda Ulytaý oblysy qurylady.
"Jezqazǵan qalasy qaitadan oblys ortalyǵy bolady. Bul aimaqta derbes oblys qurý ekonomikalyq qana emes, rýhani jaǵynan da mańyzdy sheshim. Keń baitaq qazaq jeriniń dál júreginde ornalasqan Ulytaýdyń tól tarihymyzdaǵy orny erekshe. El taǵdyry sheshilgen uly jiyndar osynda ótken. Saryarqanyń tórinde ornalasqan bul aimaqtyń týristik áleýeti óte zor. Onyń óndiristik qýatyn, logistikalyq múmkindigin utymdy paidalaný kerek", - dedi Toqaev.
Osylaisha Ulytaý aimaǵynyń damýyna jol ashylady.
Prezidenttiń aitýynsha, Almaty aglomeratsiiasyna qatysty túitkilder kóp. Oblys turǵyndary negizinen qala tóńiregine shoǵyrlanǵan. Uzynaǵashtaǵy nemese Talǵardaǵy máseleni Taldyqorǵanda otyryp sheshý ońai emes.
"Almaty oblysynyń ortalyǵyna barý úshin halyqtyń bosqa sabylýyna týra keledi. Osy jáne basqa da jaittardy eskere otyryp, Almaty oblysyn ekige bólýdi usynamyn. Bul óńirde Jetisý jáne Almaty oblystary qurylady. Almaty oblysynyń ortalyǵy Qapshaǵaida bolýy kerek. Al Jetisý oblysynyń ortalyǵy Taldyqorǵanda ornalasady", - dedi memleket basshysy.
Bul qadamdar aimaqtardy damytý isine tyń serpin beredi.
Sondai-aq prezident Qapshaǵaiǵa Qonaevtyń esimin berý týraly usynysty qoldaitynyn aitty.
"Qapshaǵai qalasy halqymyzdyń birtýar perzenti Dinmuhamed Qonaevtyń esimimen tyǵyz bailanysty. Eger jurtshylyq Qapshaǵaiǵa Qonaevtyń esimin berý kerek dep usynys aitsa, men bul pikirge qosylamyn", - dedi Toqaev.
