Májilistiń jalpy otyrysynda depýtattar ótken aptada adam ólimine ákep soqqan Jambyl, Qyzylorda oblystarynda jáne Petropavl qalasynda bolǵan qaiǵyly oqiǵalarǵa bailanysty Úkimet basshysynyń atyna depýtattyq saýal joldady, dep habarlaidy "Ult aqparat".
«Tas túsken jerine aýyr» - demekshi bul jaǵdai búkil Qazaqstandyqtardyń qaiǵysy. Órt saldarynan jazyqsyz nárestelerinen jáne azamattarynan aiyrylyp qalǵan jaqyndaryna depýtattar atynan qaiǵyryp kóńil aitamyz. Kinásiz dúnieden ótken balalarymyzdyń, azamattarymyzdyń qaýipsizdigi úshin kim jaýapty degen suraq barshamyzdy oilandyrady. Osy oqiǵa tiisti jergilikti atqarýshy organdarǵa úlken sabaq bolý qajet. Qashanǵy bizdiń turǵyndarymyz ottyń astynda qala berý kerek? Erteńgi kúni bundai jaǵdailarǵa tap bolmaýymyzǵa kim kepil?», - dedi depýtat Fahriddin Qarataev.
Onyń aitýynsha, bolǵan oqiǵalar boiynsha túbegeili sheshimdi talap etetin máseleler kóp ekenin kórsetti.
«Ótken jyldyń qyrkúieginde tiisti ókilettiktermen jáne kadrlarmen qamtamasyz etilgen Tótenshe jaǵdailar ministrligi qaita quryldy. Alaida, onyń atqarǵan jumysy árdaiym ýaqytyly jáne tiimdi bola bermeidi. 2020 jyldyń 9 aiynda elimizde toǵyz myńnan astam órt boldy, 228 adam qaza tapty, jaraqat alǵandar - 217 adam. Tótenshe jaǵdailar ministrligi qys maýsymyna daiyndyq jumystary júrip jatqandyǵy týraly málimdedi. Olardyń málimetteri boiynsha, jumystardyń barlyǵy aiaqtalyp, kemshilikterdi joiý týraly nusqaýlar berilgen. Alaida, oryn alyp otyrǵan qaiǵyly oqiǵalar istelip jatqan profilaktikalyq jumystyń jetkiliksiz ekendigin kórsetti», - dedi depýtat.
Osy oraida ol Prmeer-Ministr Asqar Maminnen Tótenshe jaǵdailar ministrligi óńirlerdiń ákimdikterimen birlesip, kópqabatty úilerge, ásirese ýaqytsha baspana men saiajailarǵa, basqa da jaily emes turǵyn úilerge árbir naqty jaǵdaida kómek kórsetý turǵysynan tolyq jumystardy júrgizýdi surady.
«Jańatas, Qyzylorda jáne Petropavldaǵy oqiǵalaryǵa qatysty júrgizilgen tergeý nátijeleri boiynsha kináli laýazymdy tulǵalarǵa eń qatań sharalar qabyldap jáne bul týraly buqaralyq aqparat quraldaryna málimet berýdi usynamyz. Osyndai jaǵdailardyń aldyn alý jónindegi ahýal erekshe baqylaýǵa alynyp, Tótenshe jaǵdailar ministrligi jergilikti ákimdiktermen birlesip, profilaktikalyq jumystardy órt qaýipsizdigin baqylaý jáne aldyn alý sharalardy kúsheitý jónindegi júieli jumystardy júrgizýdi usynamyz», - dedi Fahriddin Qarataev.
