2020 jyly sýarmaly jerlerdegi egis alańy 1,4 mln gektardy qurady. Bul týraly Úkimet otyrysynda QR Aýyl sharýashylyǵy ministri Saparhan Omarov málim etti, dep habarlaidy QazAqparat.
«Biylǵy vegetatsiialyq kezeń ońai bolǵan joq, buǵan ońtústik oblystardaǵy aýyl sharýashylyǵy taýaryn óndirýshilerdiń sý tapshylyǵyna qatysty kóptegen ótinishteri dálel bola alady. Úkimet qabyldaǵan sharalar jáne ákimdikterdiń úilesimdi jumysy arqasynda egin jinaý aitarlyqtai shyǵynsyz ótti. Mańyzdy mindetterdiń biri - sýarmaly jerlerde sýdy utymdy jáne únemdi paidalaný. Ákimdikterdiń derekterine sáikes 2020 jyly sýarmaly jerlerdegi egis alańy 1,4 mln gektardy qurady», - dedi ministr.
Onyń aitýynsha, 1,1 millionnan astam gektar nemese 79% jer betimen sýarý tásilimen sýarylady, 104 myń gektar - bular negizinen kúrish alqaptary, iaǵni jappai sý jaiý ádisimen sýarylady. Al egis alańynyń 200 myń gektaryna nemese 13,5%-yna ǵana zamanaýi tamshylatyp nemese jańbyrlatyp sýarý ádisi paidalanylady. Bul jerde Pavlodar, Qaraǵandy, Aqmola oblystarynda ylǵal únemdeý tehnologiialaryn paidalaný paiyzy joǵary ekenin atap ótý kerek.
«Sýarmaly jerlerdegi egis alańdarynyń qurylymyna da toqtala ketken jón. Statistika derekteri boiynsha qazirgi kezde sýarmaly jerlerde maily, dándi, azyqtyq, kókónis-baqsha daqyldary, maqta, kartop, kúrish jáne qant qyzylshasy ósiriledi. Kórip otyrǵanymyzdai, negizgi úles bidai men arpa siiaqty tálimi daqyldarǵa, sondai-aq maqta men kúrish siiaqty monodaqyldarǵa tiesili. Ministrlik pen oblys ákimdikteri arasynda jasalǵan memorandýmdar aiasynda sýdy kóp qajet etetin daqyldar men monodaqyldardyń úlesin azaitý, sondai-aq rentabeldiligi joǵary balama daqyldardyń (kókónis-baqsha, azyqtyq, maily daqyldar) alańdaryn ulǵaitý arqyly aýyl sharýashylyǵy daqyldarynyń egis alańdaryn ártaraptandyrý jumystary júrgizilip jatyr», - dedi S. Omarov.
Onyń sózine qaraǵanda, biyl maqta ósirý alańy 126 myń gektardy qurady, bul 2017 jylǵy deńgeiden (135 myń gektar) 8,6 myń gektarǵa az. Kúrish alańy boiynsha shamaly tómendeý baiqalady, 2017 jylmen salystyrǵanda 700 gektarǵa azaidy.
«Bul jerde memorandýmdardyń kórsetkishterine qol jetkizilmeýdiń negizgi sebebi memorandýmnyń usynymdyq sipatqa ie ekendigin, Memlekettik josparlaý júiesiniń qujattaryna jatpaityndyǵyn atap ótkim keledi. Osy máseleni retteý úshin Ministrlik salalyq «Agroónerkásiptik keshendi jáne aýyldyq aýmaqtardy damytýdy memlekettik retteý týraly» Zańǵa ýákiletti jáne jergilikti atqarýshy organdardyń quzyretine aýyl sharýashylyǵy daqyldarynyń egis alańdary qurylymyn ártaraptandyrý máselesi boiynsha kelisim jasasý normasyn engizý bóliginde ózgerister engizdi. Sondai-aq Agroónerkásiptik keshendi damytýdyń memlekettik baǵdarlamasyna suranysqa ie aýyl sharýashylyǵy daqyldarynyń egis alańdary boiynsha indikativti kórsetkishter engizildi. Bul oblys ákimdikteriniń memorandýmdar kórsetkishterine qol jetkizý boiynsha jaýapkershilikterin arttyrýǵa múmkindik beredi», - dep túsindirdi vedomstvo basshysy.
