Qazaqstandyq, álemniń 129-raketkasy Mihail Kýkýshkin US Open týrniri irikteý saiysynyń finalyna shyqty, dep habarlaidy QazAqparat.
Irikteý saiystarynyń 13-raketkasy bolyp tirkelgen M.Kýkýshkin jartylai finalda dúniejúzilik reitingte 168-satyda turǵan, taibeilik Djeison Djangpen sheberlik baiqasty.
Qazaqstandyq tennisshi qarsylasyn 6:4, 6:3 esebimen eki sette utty.
1 saǵat 26 minýtqa sozylǵan match barysynda M.Kýkýshkin 2 eis jasap, 5 breik-pointtyń úsheýin paidalandy. Taibeilik sportshy 1 eispen ǵana shekteldi.
M.Kýkýshkin irikteý saiystarynyń finalynda álemniń 150-raketkasy, frantsiialyq Antýan Oanmen kúsh synasady. Ony jeńse, negizgi týrnirge joldama alady.
Qazaqstannyń birinshi, álemniń 37-raketkasy Aleksandr Býblik 30 tamyzda bastalatyn negizgi jarysta óner kórsetedi. Onyń qarsylasy – reitingte 134-satydaǵy germaniialyq Iannik Hanfmann.
