Qazaqstannyń Syrtqy ister ministri Muhtar Tileýberdi Ýrýgvaidyń Syrtqy ister ministri Rodolfo Nin Novoamen kezdesti, dep habarlaidy "Ult aqparat".
QR SIM baspasóz qyzmetiniń málimetinshe, latynamerikalyq eldiń syrtqy saiasi vedomstvosy basshysynyń Qazaqstanǵa alǵash ret saparmen kelip otyr.
17 qazanda ótken kelissózder aiasynda ministrler Qazaqstan men Ýrýgvai arasyndaǵy qarym-qatynastardyń damýyndaǵy oń serpindi atap ótip, ekijaqty kún tártiptiń ózekti máselelerin talqylady, saiasi dialogty nyǵaitýdyń qajettiligin rastady, sondai-aq halyqaralyq jáne óńirlik máseleler boiynsha pikir almasty.
Taraptar Eýraziialyq ekonomikalyq odaq pen MERKOSÝR arasynda, sondai-aq «Bir beldeý – bir jol» bastamasy sheńberinde yntymaqtastyqty nyǵaitý perspektivalaryn basa aityp, saýda-ekonomikalyq jáne investitsiialyq baǵyttarda yqpaldastyqty damytý mańyzdylyǵyna nazar aýdardy.
Ministr Muhtar Tileýberdi shetel biznes ókilderine jasalyp jatqan qolaily jaǵdailarǵa nazar aýdaryp, ýrýgvailyq tarapty aýyl sharýashylyǵy salasynda birlesken jobalardy iske asyrýǵa jáne densaýlyq saqtaý men týrizm salalarynda tájiribe almasýǵa shaqyrdy. Elder arasyndaǵy bailanystardy kúsheitip, mádenietterimizdi jaqyndatý maqsatynda taraptar vizalyq rejimdi yryqtandyrý boiynsha tiisti kelisimderdi jasasýǵa qolǵabys kórsetýge ýaǵdalasty.
Sonymen qatar, ministrler kópjaqty formatta da dialogty nyǵaitýǵa múddeli ekendikterin jetkizdi. Iadrolyq qarýdy taratpaý jáne halyqaralyq terrorizmge qarsy kúreske erekshe nazar aýdara otyryp, taraptar BUU sheńberinde jahandyq qaýipsizdiktiń ózekti máseleleri boiynsha syndarly ózara yqpaldastyqty jalǵastyrýdyń mańyzdylyǵyn atap ótti.
Óz kezeginde, R. Nin Novoa Montovideonyń Nur-Sultanmen syndarly jáne ózara tiimdi qarym-qatynasty odan ári nyǵaitýǵa nietti ekendigin rastap, Qazaqstannyń SIM basshysyn Ýrýgvaiǵa sapar jasaýǵa shaqyrdy.
