QR Densaýlyq saqtaý vitse-ministri Kamaljan Nadyrov Almaty bas sanitarlyq dárigeriniń dárigerlerdi aiyptaýyna qatysty pikir bildirdi, dep habarlaidy QazAqparat.
Qalalyq taýarlar men qyzmetterdiń sapasy men qaýipsizdigin baqylaý departamentiniń basshysy Aizat Moldaqasymova dárigerler koronavirýs simptomymen jumysqa kelip júrdi dep aiyptaǵan bolatyn.
«Territoriialyq taýarlar men qyzmetterdiń sapasy men qaýipsizdigin baqylaý departamentiniń qyzmeti qandai? Osy organ qazir meditsinalyq uiymdardyń ishindegi eń álsiz tustaryn anyqtaý kerek. Álbette, bizdiń áriptesterimizge kemshilikterdi nuqyp kórsetken jaqpaýy múmkin. Dárigerlerdiń málimdemesine qatysty qazir tekserý júrip jatyr. Jalpy, Ortalyq klinikalyq aýrýhanadaǵy jaǵdai, dáriger áriptesimizdiń málimdemesi zerttelip jatyr. Komissiia shyǵarǵan qorytyndyǵa sáikes, zańbuzýshylyqtar anyqtalsa, ol normativtik-quqyqtyq baza sheńberinde jazasyn alady», - dedi Kamaljan Nadyrov.
Onyń aitýynsha, óz-ózin qurmetteitin kez kelgen maman meditsinalyq uiym ishinde infektsiia taralmaidy dep 100 paiyz senimmen aita almaidy.
«Bul – nonsens. Meditsina qyzmetkerleri qaýip tobyna jatady. Ortalyq aýrýhana dárigerden patsientke nemese patsientten dárigerge juǵýy ábden yqtimal. Ary qarai tizbektelip kete beredi. Bul jaǵdaiǵa túsinistikpen qaraý kerek», - dedi vitse ministr.
Kamaljan Nadyrov qazir birinshi mindet – bireýdi jumystan shyǵarý emes, máseleniń sebep-saldaryn aiqyndaý ekenin aitty.
«Áriptesterimdi eshkimdi aiyptap, urysýdy qoia turýǵa shaqyramyn. Qazir biz bul máselege tereńdemei, odan da birigip jumys isteýimiz kerek. El basshylyǵy men halyqtyń bizden kútip otyrǵany osy ǵana», - dedi ol.
