BAQ ókilderine arnalǵan memlekettik «Úrker» syilyǵynda jańa nominatsiia paida bolmaq. Bul týraly QR Aqparat jáne qoǵamdyq damý ministri Darhan Qydyráli málim etti, dep habarlaidy QazAqparat.
«Ahmet Baitursynuly jáne basqa da Alash ardaqtylaryn ulyqtaýda Memleket basshysynyń bastamasymen kóptegen irgeli ister atqarylyp jatyr. Búgin Ahańnyń týǵan ólkesi Qostanaida úlken toi ótý kerek edi. Tótenshe jaǵdai bolyp qaldy. Qostanai halqyna sabyr tileimiz», - dedi Darhan Qydyráli elordada ótip jatqan Ahmet Baitursynulyna arnalǵan halyqaralyq konferentsiiada.
Ministrdiń aitýynsha, búginde Ahmet Baitursynulynyń murasyna arnalǵan ǵylymi týyndylar jazylyp, derekti film túsirilip jatyr.
«Biyl ótetin «Astana Media Week» halyqaralyq sharasynda Ahmet Baitursynulyna arnalǵan taqyryp uiymdastyramyz. Sol siiaqty «Úrker» shyǵarmashylyq baiqaýynyń úlken bir atalymyna Ahmet Baitursynuly ataýyn berý josparlanyp otyr», - deidi ol.
Aita keteiik, elordada Ahmet Baitursynulynyń mol murasyna arnalǵan «Ahmet Baitursynulynyń ǵylymi murasy jáne Qazaqstannyń ziiatkerlik sabaqtastyǵy» atty ǵylymi-praktikalyq halyqaralyq konferentsiia ótip jatyr.
Sondai-aq, atalǵan shara barysynda Ahmet Baitursynuly atyndaǵy memlekettik syilyqtyń taǵaiyndalatyny belgili boldy.
