Halyq sanaǵy azamattardyń turǵyn úi jaǵdaiyn jaqsartý úshin mańyzdy. Bul týraly Almaty qalasy Josparlaý jáne ýrbanistika basqarmasynyń basshysy Almashan Ahmedjanov brifing barysynda aitty, dep habarlaidy QazAqparat.
Spikerdiń sózinshe, BUU-nyń halyq sanaǵyn jáne turǵyn úi qoryn júrgizý jónindegi Eýropalyq statistikter konferentsiiasynyń usynymdaryna sáikes «Halyq sanaǵy» el aýmaǵynda jáne onyń eń az geografiialyq birlikterinde turatyn halyq sanyn, búkil halyqtyń áleýmettik jáne demografiialyq sipattamalaryn terý jónindegi aqparatpen qatar, turaqty ýaqyt aralyqtary arqyly resmi esepke alýdy júrgizýge múmkindik beretin is-shara retinde aiqyndalady.
«COVID-19 pandemiiasyna bailanysty elimizde 2020 jylǵa josparlanǵan kezekti ulttyq halyq sanaǵyn ótkizý 2021 jylǵa aýystyryldy. QR Statistika agenttigi halyqtyń aldyńǵy sanaqtarynyń, áleýmettik-demografiialyq zertteýlerdiń qolda bar materialdaryn jinady jáne zerttedi, demograf ǵalymdar men basqa da mamandardyń usynystary men eskertýlerin, osyndai is-sharalardy ótkizý jónindegi halyqaralyq uiymdardyń usynymdary men tájiribesin eskerdi», - deidi ol.
Onyń aitýynsha, júrgizilip jatqan sanaq eń senimdi aqparat kózi. Sebebi ol azamattardyń jeke saýalnamalaryna negizdelgen.
«Bul derekter 10 jyldaǵy halyqtyń demografiialyq jáne áleýmettik-ekonomikalyq damýynda bolǵan ekonomikalyq, demografiialyq jáne áleýmettik ózgeristerdiń kórsetkishi ekeni belgili. Oǵan jalpy el boiynsha, qalalyq jáne aýyldyq jerler boiynsha jáne óńirlik bóliniste jynysy men jasy, neke jaǵdaiy, ulttyq quramy, azamattyǵy, dini senimi, bilim deńgeii, tilderdi bilýi, úi sharýashylyqtarynyń sany men mólsheri, turǵyn úi jaǵdailary jáne basqa da sapalyq jáne sandyq belgileri boiynsha halyq sanynyń qurylymyndaǵy ózgerister kiredi», - dedi Almashan Ahmedjanov.
Qorytyndylai kele, ol halyq sanaǵy – bul Qazaqstannyń Ulttyq statistika júiesiniń quramdas jáne ajyramas bóligi, halyq pen onyń turǵyn úi jaǵdailary týraly derekterdiń negizgi kózi ekenin eske saldy.
«Sanaq nátijeleri úi sharýashylyq jaǵdaiyn, neke-otbasy qatynastaryn jaqsartýǵa, múmkindigi shekteýli adamdardyń ómirin, halyqtyń turǵyn úi jaǵdailaryn jaqsartý jónindegi memlekettik baǵdarlamalardy ázirleý úshin, sondai-aq bilim berý, jumyspen qamtý, týý jáne kóshi-qon máseleleri boiynsha sheshimder qabyldaý úshin qajet»,- deidi spiker.
A. Ahmedjanov Almaty turǵyndaryn halyq sanaǵyn keiinge qaldyrmaýǵa jáne onlain ótýge shaqyrdy.
Aita ketsek, Ýrbanistika basqarmasynda, sondai-aq «Almaty Bas jospary» ǴZI qyzmetkerleriniń 100%-y jańa formatta sanaqtan ótti.
