Qazaqstanda 15 sáýir men 15 maýsym aralyǵynda bidai men un eksporty kvotalanady. Bul týraly QR Aýyl sharýashylyǵy birinshi vitse-ministri Aidarbek Saparov aitty, dep habarlaidy QazAqparat.
«Bizdiń oiymyzsha, másele astyqtyń kóleminde emes, onyń baǵasynda bolyp otyr. Buryn bizdiń un tartatyn kásiporyndar bidaidy Reseiden anaǵurlym tómen baǵaǵa kóp importtaityn, al bizdiń astyq negizinen eksportqa ketetin. Bul balans Resei dándi daqyldardy eksporttaýǵa tyiym salǵansha saqtaldy. Atalǵan sheshim un tartýshylardy shuǵyl túrde ishki naryqtan shikizat alýǵa kóshýge májbúr etti jáne tiisinshe astyq baǵasy ósti», - dedi A. Saparov ortalyq kommýnikatsiialar qyzmetinde ótken baspasóz máslihatynda.
Spikerdiń aitýynsha, qazirgi qordaǵy 6,4 mln tonna astyqtyń 3,4 mln tonnasy aýyl sharýashylyǵy taýaryn óndirýshilerde saqtaýly, al olar óz ónimin qymbatyraq satqysy keledi.
«Fermerlerge de egistik jumystaryn júrgizýge, nesiesin óteýge qarajat qajet ekenin túsiný kerek. Árine, fermerler qolda bar qoryn satýǵa tyrysady. Osyǵan bailanysty, ishki naryqta tapshylyq týdyrmaý úshin jáne un tartatyn kásiporyndarǵa júktemeni azaitý maqsatynda Syrtqy saýda saiasaty jáne halyqaralyq ekonomikalyq uiymdarǵa qatysý máseleleri jónindegi vedomstvoaralyq komissiia 15 sáýir men 15 maýsym aralyǵynda bidai men un eksportyn kvotalaý sheshimin qabyldady. Bidai kvotasynyń kólemi – 1 mln tonna, un – 300 myń tonna», - dedi AShM ókili.
Sondai-aq ishki naryqtaǵy naqty jaǵdaidy baǵalaý úshin Ministrlik QR Strategiialyq josparlaý jáne reformalar jónindegi agenttiginiń Ulttyq statistika biýrosymen jáne jergilikti atqarýshy organdarmen birlesip, óńirlerde bidaidyń bar-joǵyn túgendeý jumystaryn bastady.
«Osylaisha Úkimet ishki naryqty áleýmettik mańyzy bar azyq-túlik taýarlarymen tolyqtyrý sharalaryn bastady», - dedi Aidarbek Saparov.
Buǵan deiin Astyq óńdeýshiler odaǵy elimizde bir jarym aptaǵa ǵana jeterlik bidai qory qalǵanyn málimdegen edi. Astyq ósirýshiler men óńdeýshiler bidaidy bólise almai daý týǵany, bidai taýsylsa barlyq diirmender jumysyn toqtatýǵa májbúr ekeni aitylǵan.
Óz kezeginde Aidarbek Saparov elde eshqandai astyq tapshylyǵy joq ekeninhabarlady. 1 sáýirdegi jaǵdai boiynsha respýblikada 6,4 mln tonna astyq bolǵan.
