Semei qalasyndaǵy Shákárim ýniversitetiniń túlekteri diplomda ketken qateniń saldarynan jumysqa tura almai qalǵan, dep habarlaidy QazAqparat.
Sońǵy kúnderi áleýmettik jeliler men BAQ-ta Shákárim ýniversiteti túlekteriniń tap bolǵan qiyndyǵy týraly jazylyp jatyr. Belgili bolǵandai, úsh tilde beriletin diplomnyń aǵylshyn tilindegi nusqasynda eki sózde qate ketip qalǵan.
Al qateni túzetip diplomdy qaita jasatý úshin biraz ýaqyt kerek. Sonyń saldarynan oqý bitire salysymen jumysqa turmaq bolǵan kei túlekterdiń oiy iske aspai qaldy.
Atalǵan máseleniń anyq-qanyǵyn bilý úshin Shákárim ýniversitetine habarlasyp kórdik.
Bilim ordasynyń baspasóz hatshysy Shyryn Qaýanova bilim týraly diplom alýshynyń qujatynda orfografiialyq qateler ketken jaǵdaida joǵary oqý orny jaýapkershilikti óz quziretine alatyndyǵyn jáne qujat alýshynyń ótinishi boiynsha diplom qaitadan shyǵarylyp beriletindigin túsindirdi.
«QR Bilim jáne ǵylym ministriniń 2018 jyldyń 30 qazanyndaǵy Joǵary jáne (nemese) joǵary oqý ornynan keiingi bilim berý uiymdary qyzmetiniń úlgilik qaǵidalarynyń №48 pýnktine sáikes, «Joǵary jáne (nemese) joǵary oqý ornynan keiingi bilim berý baǵdarlamasyn igergenin rastaǵan jáne qorytyndy attestattaýdan ótken bilim alýshyǵa attestattaý komissiianyń sheshimimen tiisti bilim berý baǵdarlamasy boiynsha «bakalavr» nemese «magistr» dárejeleri nemese maman biliktiligi taǵaiyndalady jáne qosymshasy bar diplom tegin negizde beriledi» dep kórsetilgen. Diplomda orfografiialyq qate ketkende qujat alýshynyń ótinishi boiynsha diplom qaitadan shyǵarylyp beriledi. Bitirýshi túlekterdiń ózindik úlgidegi bilim týraly qujattarynda nómiri men QR kodtary kórsetilgen. Sáikesinshe, qujat iesi nemese jumys berýshi generatsiialanǵan nómirler men QR kodtary arqyly UBBDQ bazasynan bitirýin rastaityn qujat týraly aqparatty kóre alady. Mundai jaǵdai joǵary jáne joǵary oqý ornynan keiingi bilim berý uiymdarynda oryn alǵan jaǵdaida qujat alýshy oqý ornynyń tiisti bólimine ótinish bildirýi kerek», - dedi ol.
