Úndistan astanasy Niý-Deli qalasynda jaryq kóretin «Political Events» («Saiasi oqiǵalar») jýrnalynda Livandaǵy qazaqstandyq bitimgerler jaily maqala jariialandy, dep habarlaidy "Ult aqparat".
Maqalada Úndistan 1948 jyldan bastap Birikken Ulttar Uiymynyń missiialaryn bitimgerlermen aýqymdy qamtamasyz etip otyrǵany aitylady. Sonymen qatar osy ýaqytqa deiin Úndistan atalǵan uiymnyń 71 bitimgershilik missiiasynyń 49-yna qatysqany, missiialarǵa qatysqan áskeri qyzmetshiler men politseilerdiń jalpy sany 250 myńnan astam adamdy quraityndyǵy atap ótiledi.
«Budan basqa, bitimgershilik qyzmet aýqymyndaǵy yntymaqtastyq Úndistannan basqa eldermen de belsendi damýda. Osyndai ózara is-qimyldyń jaǵymdy úlgisiniń biri retinde Úndistan men Qazaqstannyń yntymaqtastyǵyn atap ótýge bolady. Osylaisha, Úndistan Aziia men BUU-nyń tarihynda óziniń bitimgershilik kontingentiniń quramyna basqa eldiń bólimshelerin qabyldaýǵa kelisken alǵashqy el boldy. Atap aitqanda, 2018 jylǵy tamyzda Qazaqstan men Úndistan arasyndaǵy BUU-nyń Livandaǵy Ýaqytsha kúshterindegi (United Nations Interim Force In Lebanon-UNIFIL) úndistandyq batalon quramynda qazaqstandyq bitimgershilik kontingentti birlesip óristetý týraly memorandýmǵa qol qoidy», - delingen maqalada.
Jýrnal 2018 jyldyń qazanynan bastap Qazaqstandyq bitimgershilik rota BUU-nyń Livandaǵy ýaqytsha kúshterindegi «ÚndBat» Úndi batalonynyń quramyna kirgenin atap ótedi. Qazaqstandyq bitimgershiler baǵytynyń negizgi maqsaty - Úndistan Respýblikasynyń bitimgershilik tájiribesin zerdeleý jáne sondai-aq ony bitimgershilik missiialarda qoldaný. Kún saiyn úndi jáne qazaqstandyq bitimgerler keminde 50 mindetti birlesip oryndaidy. Olardyń ishinde jergilikti jerdi patrýldeý, halyqqa kómek kórsetý, baqylaý beketterin uiymdastyrý jáne missiia shtabynyń basqa da is-sharalaryna qatysý bar. Sondai-aq áskeri qyzmetshiler óz elderiniń mádenietimen, dástúrlerimen jáne turmysymen tanysatyn birlesken mádeni is-sharalar ótkizedi.
«BUU-nyń Livandaǵy missiiasynyń qolbasshylyǵy koalitsiialyq operatsiialardy júrgizýdiń naqty urys jaǵdailarynda kópultty kúshter quramynda ózara is-qimyldyń biregei tájiribesine ie bolǵan úndistandyq jáne qazaqstandyq bitimgerlerdiń kásibi deńgeiin joǵary baǵalaidy. Bitimgershilik missiialarǵa qatysýǵa daiyndyq aiasynda qazaqstandyq áskeri qyzmetshiler sheteldik nusqaýshylardyń, onyń ishinde úndi bitimgerleriniń basshylyǵymen BUU-nyń Niý-Delidegi daiyndyq ortalyǵynda jáne Almaty qalasyndaǵy «Beibitshilik jolyndaǵy seriktestik» oqý ortalyǵynda (KAZTsENT) oqýdan ótip, BUU-nyń sertifikatyn alatynyn aita ketken jón. Livanda bitimgershilik qyzmetti júzege asyrý kezinde qazaqstandyq bitimgerler alǵan tájiribesin, joǵary jaýyngerlik mashyǵy men kásibiligin kórsetkeni aitylady. Qazirgi ýaqytta taraptar qazaqstandyq bitimgershilik kontingentiniń UNIFIL-de úndi bitimgershilik batalonynyń quramynda bolý merzimin uzartý týraly másele sheshilýde», - dep jazady úndi basylymy.
