Úndistannyń soltústik-shyǵysyndaǵy Assam shtatynyń Nagaonynda 18 jabaiy pildiń óli deneleri tabyldy, dep habarlaidy VVS agenttigi.
Memlekettik sheneýnikter pilderdiń Kandoli qoryǵynda naizaǵai soǵýy saldarynan qyrylǵanyn aityp otyr.
Jaqyn mańdaǵy eldi meken turǵyndary janýarlardyń óli denelerin taýyp, bul týraly bilikke habarlaǵan.
Assamnyń bas ministri Himanta Bisva Sarma pilderdiń osynshama kóp sanynyń qyrylýyna alańdaýshylyq bildirip, arnaiy tergeý amaldarynyń bastalǵanyn málim etti.
Úndistanda 27 myńnan astam aziialyq pil bar, sonyń 21 paiyzyna jýyǵy Assamda mekendeidi.
Bul – osy aimaqtaǵy 20 jyldyń ishinde bir ýaqytta qyrylǵan pilderdiń eń kóp sany.
