Úndistannyń soltústigindegi Ýttarakhand shtatynda 7 aqpanda bolǵan muzdyqtyń qulaýynan qaza tapqandar sany 67-ge jetti, dep habarlaidy Latestly aqparattyq portaly.
Jeksenbi kúngi jergilikti politsiianyń deregine qaraǵanda shamamen 140 adam iz-túzsiz joǵalyp ketti. Ázirge tek 37 máiittiń kim ekeni anyqtaldy. Al 18 aqpanda NDTV telearnasy 61 adamnyń qaza tapqanyn habarlady.
Senbi jáne jeksenbi kúnderi áskeri súńgýirler muzdyq qulaǵannan keiin Rishigangi ózeni aimaǵynda paida bolǵan kólge zertteý júrgizdi. Muz ben balshyq massasy ózenge quiatyn bulaqtyń saǵasyn jaýyp tastaǵan. Sý resýrstary jónindegi ortalyq komissiianyń málimetteri boiynsha, paida bolǵan kóldiń uzyndyǵy 400 m, eni - 25 m, tereńdigi - 60 m.
Muzdyq 7 aqpanda tańerteń Rishiganga aǵatyn Dhaýliganga ózeniniń alqabyndaǵy Chamoli okrýginde qulady. Bul aýdanda qýattylyǵy 520 MVt bolatyn sý elektr stantsiiasy salynýda. Osy taýly aimaqtyń damýy úshin eń mańyzdylarynyń biri bolyp sanalatyn jobadaǵy bóget tolyǵymen joiyldy. Sondai-aq, bes kópir qirady, tómengi aǵystaǵy taǵy bir gidroenergetikalyq joba zaqymdaldy.
