Úndistanda qudyqqa qulap ketken balany úsh kúnnen beri qutqara almai jatyr, dep habarlaidy VVS.
Úndistannyń ońtústigindegi Tamil Nadý shtatynda kóshede kórshileriniń balalarymen oinap júrgen Sýdjit Ýilson esimdi 2 jasar bala abaisyzda tereńdigi 180 metr keletin qudyqqa qulap ketken.Ol qudyqtyń túbine jetpei, on metrdei jerde ilinip qalǵan.
Ensiz qudyqqa eresek adam túse almaidy. Sondyqtan úsh kúnnen beri ony shyǵara almai álek.
Qutqarýshylar qudyqtyń ishine aýa aidap jatyr, biraq onyń balaǵa jetip jatqanyna eshkim kepildik bere almaidy. Qutqarýshylardyń ekinshi toby bala otyrǵan qudyqtyń janynan ekinshisin qazýda.
Jergilikti gazetterdiń jazýynsha, balany sheshesiniń ózi qutqaryp alýdyń amalyn qarastyrǵan. Esi shyqqan ana aldymen qapshyq tigip, balasyn «aýlap» almaqshy bolǵan, artynsha ózi qudyqqa túspekke árekettenedi. Biraq onysynan esh nátije shyqpaǵan.
