Álemde koronavirýs infektsiiasyn juqtyrǵandar sany 26,96 millionǵa jetse, aýrýdan qaitys bolǵandar 879 myńnan asqan. Al Úndistanda Covid infektsiiasy bir kúnde 90 myń adamnan anyqtalyp, táýlik kórsetkishi boiynsha álem rekordy jańardy. Bul týraly Reuters agenttigi habarlady.
Úndistanda jeksenbi, 6 qyrkúiek kúni 90 myń adamnyń koronavirýs infektsiiasyn juqtyrǵany anyqtaldy. Táýlik ishinde 1065 Covid ólimi tirkelgen. Eldegi virýs juqtyrǵandar sany 4,1 millionǵa, aýrýdan qaitys bolǵandar sany 70,6 myńǵa jetken. Covid infektsiiasyn juqtyrǵandardyń jalpy sany jóninen Úndistan Braziliiaǵa jaqyndap qaldy. Onda virýs juqqandar sany bir kúnde 30 myńǵa artyp, jalpy sany 4,12 millionǵa jetken. Indetten 126 myń adam qaitys bolǵan.
Meksikada resmi derek boiynsha koronavirýstan 67 326 adam qaitys bolǵan. Bul – Covid ólimi boiynsha álem elderi arasynda tórtinshi kórsetkish. Eldiń densaýlyq saqtaý ministri biyl tamyzǵa deiin ólim sany boljanǵan kórsetkishten 122 765-ke kóp bolǵan deidi. Bul koronavirýstan qaitys bolǵandardyń sany resmi kórsetkishtegiden joǵary bolýy múmkin ekenin bildiredi.
Virýs juqtyrǵandar sany boiynsha kósh basynda turǵan AQSh-ta 6,3 millionǵa jýyqtaǵan. Infektsiia juqtyrǵan 188,5 myń adam dúnieden ozǵan. El qyrkúiektiń birinshi dúisenbisinde ótetin Eńbek kúni meiramyna daiyndalyp jatyr. Dástúr boiynsha bul kúni saltanatty parad ótip, buqaralyq jiyndar ótedi. Aq úi basshysy Donald Tramp mereke qarsańynda amerikalyqtardy áleýmettik qashyqtyqty ustanýǵa shaqyrdy.
