Úndistannyń Chhattisgarh shtatynda jabaiy aiýdyń shabýyly saldarynan eki adam qaza taýyp, taǵy eki turǵyn aýyr jaraqat aldy, dep habarlaidy ult.kz.
Oqiǵa kezinde 45 jastaǵy er adam men onyń 40 jastaǵy qaryndasy egistik alqabynda júrgen. Jyrtqysh olarǵa tap berip, ekeýin de óltirgen. Aiý qurbandardyń denelerin bólshektep, biraz ýaqyt boiy oqiǵa ornynan alystamaǵan.
Qandy oqiǵanyń kadrlary áleýmettik jelide tarady. Keiin jyrtqysh aýyl aýmaǵyna kirip, turǵyndarǵa qaýip tóndirgen. Ony ustaýǵa kelgen qutqarýshylar men orman sharýashylyǵy qyzmetkerlerin de jaqyndatpai, tipti arnaiy kólikke qarai umtylǵan.
Uzaqqa sozylǵan operatsiia barysynda mamandar aiýdy uiyqtatatyn dári salynǵan oqpen atyp, aqyry qolǵa túsirgen. Alaida ashýǵa býlyqqan jergilikti turǵyndar es-tússiz jatqan janýardy taiaqpen ura bastaǵan. Oqiǵa ornyna kelgen politsiia olardy toqtatyp, aiýdy qorǵaýǵa májbúr bolǵan.
Aldyn ala málimet boiynsha, shabýyldan az ýaqyt buryn jyrtqyshtyń qonjyǵy óli tabylǵan. Mamandar aiýdyń agressivti áreketine osy jaǵdai sebep bolýy múmkin ekenin joqqa shyǵarmaidy.
Qaza tapqan eki adamnyń otbasyna bilik tarapynan 600 myń rýpiiden, iaǵni shamamen 2,9 million teńgeden ótemaqy tólenetini habarlandy.
Jergilikti turǵyndar bolsa, bilikke narazylyq bildirip otyr. Olardyń sózinshe, jabaiy ańnyń eldi meken mańynda júrgeni týraly aldyn ala eskertý bolǵanymen, qaýiptiń aldyn alý úshin tiisti sharalar ýaqytynda qabyldanbaǵan.
