Foto: ashyq derekkóz
Úndistan Chinab ózenindegi bóget shliýzderin ashyp, Pákistanǵa sý jiberýdi qaita bastady. Bul týraly ANI agenttigi habarlady.
«Chinab ózeninde ornalasqan Baglihar gidroelektrostantsiiasy bógetiniń eki shliýzi ashyldy», — delingen habarlamada.
Agenttik derekkózderiniń málimetinshe, bógetten sý aǵyzýǵa aimaqtaǵy Djammý men Kashmirde jaýǵan qatty jańbyr sebep bolǵan. Jańbyr sý tasqynyna alyp kelýi múmkin degen qaýip bar. Úndistan Chinab ózenindegi bóget arqyly sý jiberýdi biylǵy 6 mamyrda toqtatqan bolatyn.
Buǵan deiin Úndistan Ind ózeniniń Pákistan baǵytyna aǵýyn da bógegen edi. Bul 1960 jyly qol qoiylǵan Ind ózeniniń sý resýrstaryn bólisý kelisiminen keiingi alǵashqy jaǵdai. Sol kezde taraptar saiasi qaishylyqtarǵa qaramastan sý resýrstaryn bólisetin bolyp kelisken edi.
