Keshe ánshi Dimash Qudaibergenniń tyńdarmandary úshin umytylmas kún boldy. Elordadaǵy Astana Arena stadionynda «Arnaý» atty jeke kontsertin ótkizgen ánshi kórermenniń ystyq yqylasyna bólendi.
«Men úshin baqyt – sahna»
Dimash jeke kontserti shymyldyǵyn «Golden Intro» ánimen ashyp, «Aqqýym» ánimen jalǵastyrdy.
«Árkimniń óz baqyt ólshemi bar. Meniń baqytym – sahna. Meniń ánderim júrekterińizge jetken bolsa, ómirdegi úlken missiiamnyń oryndalyp jatqandyǵy. Qurmetti aǵaiyn, sizderdiń aldaryńyzda óner kórsetip turǵan mende arman joq. Barshalaryńyzǵa kelgenderińiz úshin kóp-kóp raqmet!» - dep, ánshi kórermenderine alǵys bildirdi.
«Án keshin otandastaryma arnaimyn»
27 án oryndalǵan Dimashtyń án keshine qazaqstandyq kórermendermen qatar álemniń AQSh, Ulybritaniia, Braziliia, Meksika, Kanada, Avstraliia, Shveitsariia jáne basqa da 64 elinen 10 myńǵa jýyq kórermen keldi.
«Sizderdiń aldaryńyzda men ózimdi Lýchano Pavorotti nemese Maikl Djeksondai sezinemin. Sizderge kóp raqmet! Eń aldymen «Halqym aman bolsyn» dep tileimin. Búgingi «Arnaý» dep atalatyn kontsertimdi ózimniń týǵan jerime, baýyrlaryma jáne álemdegi barlyq tyńdarmandaryma arnaimyn», - deidi ol.
«Liýbov ýstavshih lebedei» ániniń avtory, Resei halyq ártisi Igor Krýtoi Dimashtyń jeke kontsertine ne sebepti kelgenin aitty.
«Men Qazaqstanǵa jii kelemin, sebebi Qazaqstandy jaqsy kórem. Ekinshiden, Dimashtyń shyǵarmashylyǵyn jaqsy kórem», - dedi ol.
«Denis Ten – qazaqtyń mańdaiyna bitken shoqjuldyz»
Dimash jeke kontserti barysynda marqum dosy – Denis Tenge án arnady. Ol Denis ten óner kórsetken SOS d'un terrien en détresse kompozitsiiasyn oryndap, kontsertke qonaq retinde kelgen Denis Tenniń ata-anasyna alǵys aitty.
«Osydan biraz ýaqyt buryn Denis ekeýmiz meniń Qazaqstanda ótetin kelesi kontsertimde dýet bolyp án aitamyz dep armandap, josparlaǵan edik. Biraq... Allanyń jazǵanyna amal joq... Denis týma talant jáne óte eńbekqor jigit boldy. Az ǵana ǵumyrynda óner týyn, adamdyq týyn, qazaq eliniń týyn biikke kóterip ketti. Osy jerde Qazaqtyń mańdaiyna bitken shoqjuldyzy, bizdiń maqtanyshymyz Denis tenniń ákesi, anasy otyr. Bul qoshemet sizder úshin! Sizderge meniń ǵana emes, qazaq halqy, jankúierleri atynan yqylas gúlin berýge ruqsat etińizder! Biz sizderdiń uldaryńyzdy eshqashan umytpaimyz. Onyń Qazaqstan tarihyndaǵy róli erekshe», - deidi Dimash.
Sondai-aq, Dimash ata-apasy men naǵashy apasyna yqylas gúlin syilap, jańa án arnady.
«Meni bári qoshemetke bólep, jaqsy kóredi. Keide men osyǵan laiyqtymyn ba, álde laiyqty emespin be dep oilaimyn. Bala kezimde dál osylai bolýyn armandaityn edim. Ata-anama án arnap, ornynan turǵyzyp, alǵys aitýdy armandadym», - deidi ol.
«Arystyqtarǵa qarajat aýdaramyn»
Dimash jeke kontsertinde kórermenniń júreginen oryn tapqan ánderden bólek jańa albomnan bes án oryndady, olar: Give me your love, Screaming, Autumn strong, Lay down, If I never breathe again.
Dimash kontsert barysynda Arysta bolǵan jarylys týraly aitty.
«Shetelde kóp júrgenimmen, elimizde bolyp jatqan jańalyqtardy áleýmettik jelilerden oqyp-bilip otyramyn. Jaqynda Arysta bolǵan oqiǵa maǵan da qatty batty. Tipti kontsert berý osy kezde yńǵaisyzdaý sekildi kórindi, solai aitqandar da boldy. Alaida shetelden shaqyryp qoiylǵan qonaqtar bar, arnaiy kelýshiler bar. Solardy eskerý kerek boldy. Sondyqtan Arystyqtarǵa kómek retinde osy kontsertten túsken qarajattyń bir bóligin aýdaramyn dep sheshtim. Bul sizderdiń de kómekterińiz bolyp sanalady, aǵaiyn» - dedi Dimash Qudaibergen kontsert barysynda.
«Dimash – qubylys»
Shyǵys Qazaqstan oblysy, Kúrshim aýdanynyń turǵyny, Dimashtyń tyńdarmany Sáýle Saǵatova Dimash qaitalanbas ánshi ekenin aitty.
«Dimashtyń shyǵarmashylyǵyn erekshe jaqsy kórem. Árdaiym tileýles bolyp, ol týraly jańalyqtardy qaldyrmai oqimyn. Nur-Sultan qalasyna Dimashtyń kontserti úshin arnaiy keldim. Dimash balamyz til-kózden aman bolsyn. Ol – týma talant, ol – tekti, ol – erekshe, ol – eliniń ǵana emes, álemniń erekshe yqylasyna bólengen ánshi», - deidi Sáýle Saǵatova.
Buǵan deiin Dimash Qudaibergenniń Astana Arena stadionynda jeke kontserti ótetini týraly jazǵan bolatynbyz.
