Ulytaýdyń 72 jastaǵy turǵyny Sársenbai Qotyrashev búkil Qazaqstandy jaiaý aralap, Petropavlǵa jetip qaldy. Marafonshy 111 kúnde Qazaqstannyń 15-ten asa qalasyn jaiaý júrip ótti, - dep habarlaidy Tengrinews.kz.
"Qazaqstandyqtar men el qonaqtary meni kórip, sapardyń maqsatyn estigen boida qoldaý bildiredi. Densaýlyq, aq jol tileidi. Ár qalada meni qonaqjailyqpen qarsy alady. Qoldaý men jyly lebizdiń arqasynda maqsatyma kún saiyn jaqyndap kelemin", – deidi saiahatshy.
Marafonshynyń birneshe maqsaty bar. Týyp-ósken, eńbek etken jeri týraly aitqysy keledi. Otandyq qolónershiler týraly maǵlumat jinap, "Kókmaisa" qymyz festivalin keńinen nasihattaǵysy keledi. Marafonshynyń oiynsha, bie sútin ishý festivali ulttyq igilikke ainalýy tiis. Aitpaqshy, Sársenbai Qotyrashov júrgen jerinde qymyz iship júrýge tyrysady. Sýsyn oǵan kúsh pen qýat beredi. Aqsaqal kúnine keminde 40 shaqyrym jaiaý júredi.
"Keide kúnine 90-100 shaqyrym jaiaý júremin. Bul toqtaýǵa kóp ýaqyt ketetin jaǵdailarda. Ótip bara jatqandar birge sýretke túsýdi suraidy, sonymen qatar olardy qyzyqtyratyn suraqtarǵa jaýap beremin. Marafon kezinde 14 ret arbanyń dońǵalaqtaryn aýystyrdym. Aiaqkiim tozdy, 6 jup aýystyrdym", - dep bólisti aqsaqal.
