Ult uiasy Ulytaýda demeýshilerdiń qoldaýymen búkil túrki jurtynyń kiesi sanalatyn Kókbóri eskertkishi boi kóterdi. Ol Ulytaýdan 35 shaqyrym jerde – Jezqazǵanǵa aparatyn jol boiyndaǵy jolaýshylar tynystaityn «Kúmisbulaq» demalys orny aýmaǵynda ornatyldy. Jańa nysan - Ulytaýdy halyqaralyq etnotýrizm ortalyǵyna ainaldyrý baǵytynda qolǵa alynǵan jobalardyń biri, dep habarlaidy "Ult aqparat".
Erte dáýirden kele jatqan jalpy túrki jurtynda «Kókbóriden taraǵanbyz» degen ańyzdy bireý bilse, bireý umytqan. Kókbórini qasiet pen kieniń, qaitpas qaisarlyqtyń tamyry, ómir súrý talaptarynyń ózegi retinde qabyldaǵan. Kókbórige tán jiger men minez-qulyqty urpaq boiyna sińirýge múddeli bolǵan. Muny búgingi kúnge úzilmei jetken ańyzdar derekteri aiǵaqtaidy.
Turqy asa tartymdy nysannyń ideia avtory ári músinshisi – Eýraziia Dizainerler odaǵynyń múshesi Amantai Meńdiǵaliev.
«Ulytaý Kókbórisi» ataýy telingen eńseli eskertkishtiń biiktigi – 9,70 metr, onyń ishinde músinniń biiktigi – 6 metr, al tuǵyry - 3,70 metr.
Kókbóri músininiń jeke salmaǵy 2 tonna bolsa, tuǵyrymen qosa eseptegendegi salmaǵy – 5 tonna shamasynda. Ishki qurylymy temirden ázirlenip, jalpy bitimi 60 gradýs aiaz ben ystyqqa des bermeitin plastik materialdan quiylyp jasalǵan.
Irgetasy óte myǵym – 3/3 metr aýmaqta 2 metr tereńdikten bastap sapaly betonmen quiylǵan.
«Shyǵarmashyl adamnyń únemi oi ústinde júretini, izdeniste bolatyny belgili. «Ulytaý Kókbórisi» ideiasy meni stýdent kezimnen «mazalaityn». Osydan bir jylǵa jýyq ýaqyt buryn músinniń eskizin jasap, quzyrly memlekettik organ – QR Mádeniet jáne sport ministrliginen avtorlyq quqyq kýáligin de alyp qoiǵan bolatynmyn. Alaida, aitpasa da belgili sebeptermen ony jalpaq jurtqa jarqyratyp kórsetýdiń oraiy kelmei-aq qoiǵan. «Sabaqty ine – sátimen» demekshi, baǵaly ideiany Ulytaý aýdanynyń ákimi Berik Ábdiǵaliulynyń qoldaýymen júzege asyrý múmkindigi týdy. Oraiy kelip turǵan sharýany tiianaqtaýǵa ózimniń ulym, músinshi Armat Meńdiǵalievtiń kóp kómegi tidi», – deidi músinshi Amantai Qajimuly.
Avtordyń aitýynsha, bul – álemde osyndai sipattaǵy ári osyndai kólemdegi tuńǵysh eskertkish. Endi dúnie júzindegi eń iri Kókbóri músini halyqtyń rýhyn kóterip, namysyn janyp, eldik pen erlik ustanymyna úndep turady.
Aýdannyń atqarýshy biligi ony Ginnestiń rekordtar kitabyna engizý sharalaryna kiristi.
