Foto: Ulytaý oblysy ákimdiginiń baspasóz qyzmeti
Halyqtyń derekter bazasynyń kórsetkishterine sáikes, 2023 jylǵy 14 qarashada saǵat 08:10-da týǵan 5 bala elimizdiń 20 millionynshy turǵyny boldy. Olardyń arasynda Ulytaý oblysyndaǵy Seitjan otbasynyń perzenti Tomiris te bar.
Óńir ákimdigi baspasóz qyzmetiniń málimetinshe, búgin jas ana Áigerim Moldashevany quttyqtaý úshin oblys ákiminiń mindetin atqarýshy Ulantai Úsenov arnaiy barǵan. Tomiristiń anasyna Memleket basshysynyń, Ulytaý oblysynyń jáne Jezqazǵan qalasy ákimderiniń atynan arnaiy syilyqtar tabystalǵan.
"Sonymen qatar, aitýly oqiǵanyń qurmetine orai jas otbasyǵa «Otbasy bank» AQ-nan 2 mln teńge somasynda sertifikat tabystaldy.
Qazirgi ýaqytta jas kelinshektiń jaǵdaiy jaqsy. Búldirshinniń salmaǵy 3 keli bolsa, boiy - 49 sm.
Áigerim Moldashevanyń aitýynsha, qyzdyń esimin atasy tańdaǵan.
Tomiristiń ata-anasyn jáne óńirdiń barlyq turǵynyn osy aitýly oqiǵamen shyn júrekten quttyqtaimyz! Sábige zor densaýlyq, uzaq ta baqytty ómir tileimiz" - delingen habarlamada.
