Ulytaý oblysynda et óńdeýge arnalǵan aýqymdy kásiporyn salynady. Bul týraly aimaq ákimi Berik Ábdiǵaliuly aitty, dep habarlaidy QazAqparat.
«Aýyl sharýashylyǵyn damytýda kedergi keltirip otyrǵan másele et fabrikasynyń bolmaýyna qatysty bolyp otyr. Bizdiń óńirdegi aýdandarda mal barshylyq. Osy oraida maldyń basym bóligin ońtústik óńirlerge áketip jatyr. Iaǵni osy tasymaldanyp jatqan mal basy ońtústikte bordaqylanyp, etke ótkiziledi. Bizge osynyń barlyǵyn oblys aýmaǵynda uiymdastyrý kerek», - dedi ákim Óńirlik kommýnikatsiialar qyzmetinde.
Onyń aitýynsha, óńirde aýqymdy et kombinaty qurylatyn bolady. Sondyqtan investormen kelissóz júrgizilip jatyr.
«Qazir indýstriia aimaǵy aiqyndalyp jatyr. Sol jerge injenerlik jelilerdi tartyp qoimaqpyz. Aldaǵy jyly atalǵan nysannyń qurylysyn bastaimyz degen jospar bar. Aldyn ala esepteý boiynsha 7 mlrd teńge qarajat kerek bolyp tur. Onyń ishinde kem degende 3 myń bas maldy bordaqylaý alańy bolady. Etti óńdeý, konservileý, shujyq ónimderin shyǵarý kásiporyndary jasaqtalmaq. Bul ónimdi syrtqa shyǵarý múmkindigi de qarastyrylǵan», - dedi oblys ákimi.
Onyń aitýynsha, óńirde jylqynyń, iri qara mal basynyń sany kóbeiip keledi. Alaida, qoi sanynyń azaiǵany baiqalyp otyr.
