Foto: "Habar 24"
Ulytaý oblysyndaǵy Jańaarqa aýdanyndaǵy aýyldyq okrýgtiń biri alkogolden tolyq bas tartqan. Bul aimaqta alkogol satylmaidy da, qoldanylmaidy da. Bul turǵyndardyń ózi qabyldaǵan sheshim, keiingi úsh jylda aýyldyq okrýgte birde-bir qylmys bolmaǵan, - dep habarlaidy Tengrinews.kz saity "Habar 24" telearnasyna silteme jasap.
Jergilikti turǵyndardyń sózinshe, ishimdikten bas tartý týraly usynys eń aldymen jastardan túsken. Bul ideiany aýyl turǵyndary da qoldaǵan. Ishimdikti ishýge tyiym salynyp qana qoimai, dúken sórelerinen de alynyp tastaldy.
"Jastarymyz óte belsendi. Bárimiz ishimdikke túbegeili qarsymyz. Tynysh ómirdiń demeýshisi - ishimdiktiń bolmaýy", - deidi Sáken Seifýllin atyndaǵy aýyl turǵyny Nurlan Orynbaiuly.
Aýyldyq okrýg quramynda 3 aýyl bar. Jergilikti ýchaskelik inspektor aýyldardy kóp aralamaidy.
"Keiingi jyldary birde-bir qylmys tirkelmedi. Aýyl jastary qyzmetpen nemese mal baǵýmen ainalysady", - deidi inspektor Sáken Qartaev.
Sáken Seifýllin atyndaǵy aýylda merekeler ishimdiksiz ótedi. Dúkeni bar kásipkerler aýyl turǵyndary sekildi ishimdikten bas tartqan.
