Elbasy Nursultan Ábishuly Nazarbaev «Bolashaqqa baǵdar: Rýhani jańǵyrý» atty maqalasynda «Týǵan jer» baǵdarlamasyn qolǵa alýdy usynǵan bolatyn. «Patriotizm kindik qanyń tamǵan jerińe, ósken aýylyńa, qalań men óńirińe, iaǵni týǵan jerińe degen súiispenshilikten bastalady.
Týǵan jerge, onyń mádenieti men salt-dástúrlerine airyqsha ińkárlikpen atsalysý – shynaiy patriotizmniń mańyzdy kórinisteriniń biri. Bul shyn mánindegi ult etetin mádeni-genetikalyq kodynyń negizi» – dedi Elbasy óz maqalasynda. Tuńǵysh qazaq partiiasy – «Alash» partiiasyngyń qurylǵanyna 100 jyl tolýyna orai oblystyq máslihat depýtaty, óner men mádeniet janashyry Oral Sartaevtiń bastamasymen «Ulylarǵa taǵzym – urpaqqa amanat» ekspeditsiiasy jolǵa shyqty.
«Nur Otan» partiiasynyń Baianaýyl aýdandyq filialynyń qoldaýymen júzege asqan osynaý sharanyń eń basty ereksheligi – Baianaýyl óńirin salt atpen aralaý. Buhar jyraý, Máshhúr Júsip Kópeev, Jaiaý Musa Baijanuly, Sháken Aimanov syndy birtýar dara tulǵalarymyzben qatar, «Alash» partiiasynyń beldi músheleri, qazaq jurtynyń mańdaiyna bitken asyl perzentteri Júsipbek Aimaýytov, Sultanmahmut Toraiǵyrov, Jumat Shanin, Qoshke Kemeńgerov, Qanysh pen Ábikei Sátbaevtardyń kindik qany tamǵan jáne máńgilik jai tapqan mekenderine at basyn tirep taǵzym etip, duǵa oqyp, quran baǵyshtaý.
Baianaýyl jurty memleket basshysynyń ideiasyn qoldap, týǵan jerdiń qadir qasietin jastarǵa uǵyndyrý maqsatyn ustandy. Salt atty saiahatshylardy saltanatty túrde shyǵaryp salý rásiminde Baianaýyl aýdanynyń ákimi Orazgeldi Qaiyrgeldinov: «Biz Baianaýyl jurty qazaq danalyǵy «Týǵan jerge týyńdy tik» dep aitqandai týǵan jerimizdiń ásem tabiǵatymen qosa ótken tarihyn da qurmet tutamyz. Talai danalarymyzdy dúniege ákelgen qasietti topyraqqa taǵzym etemiz. «Nur Otan» partiiasy – «Alash» partiiasynyń zańdy jalǵasy. Sondyqtan da babalarymyz armandaǵan táýelsizdikke biz, urpaqtary, jetip otyrmyz. Baianaýyldyń eljandy, asqaq rýhty azamattarynyń bastamasymen, «Nur Otan» partiiasy Baianaýyl aýdandyq filialynyń qoldaýymen uiymdastyrylyp otyrǵan osynaý shara – týǵan jerdiń qasietin asqaqtata, aspandata túseri sózsiz» – dedi.
Baianaýyl aýdanynyń qurmetti azamaty Murat Rahmetov jurtshylyq aldynda saiahatshylarǵa bata berip, aq jol tiledi.
***
... Aitpassyń qanyń arzan dep,
Janyń arzan dep...
Bekigen janǵa Ar – Zań bop...
Bolashaq úshin sóileimin asqaq,
Júsipbek bolyp...
Maǵjan bop...
Sóileimin óktem ótkenim úshin,
Shekkenim úshin myń azap.
Óltirip alǵan bekterim úshin,
Derttener áli myna jaq...
Men joqtap júrgen namysym ediń,
Jalǵandai, áppaq armandai!
Ólermendikpen alysyp edim,
Atamnyń quny qalǵandai.
Kún bolam dep em... Kún bolam túbi...
Qul bolmaq emes arym esh...
Eldi ashyp júrse, kim bolam túbi,
jer basyp júrgen jarym es?!
Zarymdy qaitam, (úndemen, tynyp...)
Janymdy qaitem kirlegen?!
Qutylmaimyz-aý túrmeden túbi,
Mińgirlep tursam minbeden...
Sóileimin rýhpen, búginim úshin,
Aiqyn bolsyn dep erteńim...
Búgilý úshin, búliný úshin,
týǵam joq sher men dert emip...
Torǵa toǵytyp, ustaǵan ań qyp,
Qusaly kúnim, qurysyn...
Álihan óldi...
Mustafa qańǵyp...
...kim úshin?
Mańdaiyńdy, elim, jaralap bitti,
Satqyndyqtardyń soiyly.
Otandy súiý – emes qoi, tipti,
Ishi pysqandardyń oiyny.
Tarqamaǵan-dy janynan kúiik,
Tulpardai jaýyr arqasy,
Atylǵandardyń arynan biik –
Satylǵandardyń qaltasy...
Nurly kúnderden dámem aldady,
Janym aldanǵan siiaqty...
Qatal únderden záre qalmady –
...Shákárimderden uiat-ty...
Azattyǵym dep sóileimin bul kún,
Qazaqty súigen Qanyshtai...
Qymbatsyń, ǵurpym...
Qymbatsyń, jurtym...
Janymnan qymbat namystai...
Arnaiy Ult portaly úshin Baianaýyldan Elaman QABDILÁShIM
