Sársenbi kúni Buqar baba basynda túnegen atty sapar Qanysh Imantaiuly Sátbaevtiń aýylyna bet aldy.
Saiahatshylar Airyq qystaýyndaǵy Sátbai Shótikulynyń juraǵattary jerlengen qorymǵa soǵyp, marqumdar rýhyna quran baǵyshtady. Bul ziratta uly akademiktiń ákesi Imantai jerlengen.
Budan ári «Imantai qorasy» dep atalatyn jazyqta tóbe basynda ornatylǵan belgitasqa buryldy. Alystan menmundalaityn bul belgitas urpaq jadyna máńgilik eskertkish. Sebebi bunda «Qanysh Sátbaevtiń dúniege kelgen jeri» ekendigi jazylǵan. Attylar aldaǵy jyly 120 jyldyq mereitoiy kele jatqan Alashtyń birtýar ulyna jasalar qurmet te erekshe bolar degen senimmen attandy.
Akademik aýyly – qazirgi Teńdik aýylynyń syrtyndaǵy qabirstanǵa da arnaiy burylǵan ekspeditsiia osy qorymda jerlengen Qarjas rýynan shyqqan ataqty bi Shorman Kúshikulynyń úlken uly Musa Shormanov rýhyna duǵa baǵyshtady. Musa myrza Baianaýyl syrtqy okrýginiń aǵa sultany bolǵan. Ol Baianaýylda tuńǵysh meshit saldyrǵan ári bi, ári sheshen.
Aýylǵa jetken serilerdi aýyl aqsaqaldary qarsy aldy. Ekspeditsiia basshysy Oral Sartaev pen Aldamjar Altynbek Uly Otan soǵysynda mert bolǵan bozdaqtarǵa arnalǵan eskertkishke gúl shoqtaryn qoidy.
Merekelik keshke ulasqan ulaǵatty shara, akademik mýzeiin aralaýmen jalǵasty.
Aýyl aqsaqaly Serik Aýtaev qadirli meimandardyń aldynda nemeresin tuńǵysh ret atqa otyrǵyzyp, qazaqtyń «Ashamaiǵa mingizý» dástúrin dáriptedi. Ulttyq oiyndar da nazarǵa usynylyp, aýyl azamattary teńge alý saiysyna tústi.
Sal attylar Máshhúr Júsip Kópeev aýylyna jol tartty.
Arnaiy Ult portaly úshin Qanysh Sátbaev aýylynan Elaman QABDILÁShIM
