«Ulylarǵa taǵzym – urpaqqa amanat» salt atty sapar 13-shi mamyr kúni jazýshy, «Alash» partiiasynyń múshesi Júsipbek Aimaýytov atyndaǵy aýylda boldy. Saiahatshylar tobyn aýdan ákiminiń orynbasary Mádeniet Ahmetov, aýyl ákimi Rýslan Muqashev jáne aýyl aqsaqaldary qarsy aldy.
«Alash» partiiasynyń júz jyldyǵyna orai, áýlieli Qyzyltaý baýyrynda oryn tepken qasietti mekende oblystyq kókpar týrniri uiymdastyryldy. Tartysty týrnirde Mai aýdanynyń «Saty» aýylynyń komandasy top jardy. Jeńimpazdardy salt atty sherý músheleri marapattady.
Tarihymyzǵa taǵzym etip, ulylar rýhyna táý etý maqsatynda jolǵa shyqqan ulttyq óner men mádenietimizdiń janashyrlary jolshybai Leker qajy aýylyna at basyn buryp, ǵumyrynda eki ret basty paryzyn ótegen, dúnie-múlik, bailyq jimai, aqyl-parasatymen, kóregendiligimen ortasyna syily bolǵan qajy ata arýaǵyna quran baǵyshtaǵan bolatyn.
Salt atty sherýde atqa qonǵan ólketanýshy, shejireshi Ramazan Nurǵaliev ólkeniń tarihymen tanystyrdy. Aldymen Iliias Jansúgirovtyń «Qulager» poemasynda ataqty Pań Nurmaǵambettiń ákesi Saǵynaiǵa úsh júzdiń basyn qosyp Ereimentaýda as bergen jiynda, myń úsh júz attyń ishinen shashasyna shań juqpaǵan júirik tulpardy jazbai tanyǵan Qozǵan Kúreńbai synshynyń máńgilik jai tapqan mekenin kórsetti.
Synshy beiitinen Haziret qystaǵyna jol tartqan sherýge alystan Mádidiń Úshqarasy menmundalap turdy. Qaraǵandy oblysynyń Egindibulaq aýdany men Júsipbek aýylyn Túndik ózeni bólip jatyr. Ramazan Dinisuly Haziret qystaǵyndaǵy eski jurttyń ornyn kórsetti. «Bul jer eski medireseniń orny. Buny Buharadaǵy Kókiltash medresesinde oqyǵan Ábilda haziret Isabekuly Kúlik rýynyń bai-qýatty azamattarynyń kómegimen saldyrǵan. Bul mediresede Júsipbek Aimaýytov pen Qadyr Taishyqov saýat ashqan» - dedi ólketanýshy. Bul medireseniń taǵy bir ereksheligi qyz balalardyń da bilim alǵandyǵy. Kúlik eliniń azamattary qyzdarynyń da kózi ashyq bolǵanyn basty nazarda ustaǵan.
«Júsipbek Aimaýytov dúniege kelgen Dándebai aýyly qazirgi aýyl turǵan jerden on eki shaqyrymdai qashyqtyqtaǵy Qaranyń adyry degen jerde. Dándebai aýyly qolónershilikti asa joǵary deńgeide damytqan. Sol kezeńderde «Dándebai kórpeleri», «Dándebai syrmaǵy», «Dándebai tymaǵy» degen sózder kóp aitylǵan. Sol Dándebaidan Oimaýyt, Torǵaýyt, Ábdiraman, Isa, Ospan degen bes ul týady. Bes uldyń úlkeni Oimaýyt Júsipbektiń ákesi» - dedi Ramazan Nurǵaliev.
Áýlieli Qyzyltaý baýyrynda jerlengen esimderi osy óńirge keńinen taralǵan marqumdardyń beiitterin aralap, quran baǵyshtaǵan salt atty sapar qazaq teatrynyń atasy Jumat Shanin atyndaǵy aýylǵa jol tartty.
Arnaiy Ult portaly úshin Baianaýyldan Elaman QABDILÁShIM
